Ministri i Financave, Hekuran Murati, ka bërë të ditur se buxheti për ushtrinë është katërfishuar gjatë mandatit të Qeverisë Kurti, duke marrë kështu prioritet maksimal në vetëm pesë vjet.
Sipas tij, rritja e ndjeshme e financimit ka bërë që të tejkalohet edhe plani i tranzicionit për Forcën e Sigurisë së Kosovës.
Murati ka kujtuar se me qeveritë e kaluara shpenzimet për ushtrinë nuk kishin kaluar kurrë nivelin prej 50 milionë eurosh, gjë që sipas tij, tregon qartë ndryshimin e qasjes ndaj forcimit të kapaciteteve mbrojtëse të vendit.
Në publikimin e tij, ministri ka paraqitur edhe një grafik krahasues që pasqyron trendin e buxheteve të ndara për ushtrinë ndër vite.
