Forca e Sigurisë së Kosovës tashmë është pajisur me fluturaket pa pilot Puma, të blera nga Shtetet e Bashkuara të Amerikës. Kjo nismë shihet si një hap i rëndësishëm drejt forcimit të kapaciteteve të FSK-së, por sipas ekspertëve të aviacionit, Kosova duhet të ketë staf profesional, të shkolluar e të trajnuar për menaxhimin e këtyre dronëve.
Forca e Sigurisë së Kosovës, në bazat e saj tashmë ka arritur t`i vendosë edhe fluturaket pa pilot. RQ-20 Puma janë fluturaket që Ministria e Mbrojtjes ka blerë nga Shtetet e Bashkuara të Amerikës.
Blerja e këtyre fluturakeve nga Kosova po shihet si kapacitet tjetër i nevojshëm për rritjen e aftësive të FSK-së në fushën e sistemeve ajrore pa pilot.
Por, sipas ekspertëve të aviacionit, Kosova duhet të ketë staf profesional të trajnuar e shkolluar për menaxhimin e këtyre dronëve.
Afrim Aziri thekson se në një kohë kur luftërat karakterizohen gjithnjë e më shumë nga përdorimi i dronëve në operacione luftarake, është jetike që Kosova të ketë kapacitete të plota njerëzore në përdorimin e këtyre mjeteve.
“Trendi është tash të zhvillohen edhe pilot të dronëve, të fluturakeve pa pilot. Është në rritje e sipër kërkesa për ta sidomos lufta Ukrainë-Rusi e ka dëshmuar që betejën po e fiton ajri jo toka dhe rezultate më të mëdha po arrihen me sulme ajrore, sidomos me fluturake pa pilot”, tha, Afrim Aziri, ekspert i aviacionit.
Por, për çfarë mund të përdoren këto fluturake?
“Ne jemi në mbrojtje, nuk kemi asparita territoriale ndaj askujt edhe mirë do të ishte të ngriten kapacitetet për monitroim, vëzhgim të kufirit, për fluturime inteligjente, përcjellje, mbrojtje kibernetike edhe nga ajri përmes sisteme të avancuara”, deklaroi Aziri.
Në anën tjetër, njohësi i sigurisë, Arben Dashevci, thotë se sikurse çdo vend tjetër demokratik, edhe Kosova duhet t`i këtë kapacitetet e veta mbrojtëse, sidomos duke marrë parasysh kërcënimet e vazhdueshme nga Serbia.
“Republika e Kosovës është shtet demokratik, është në aleancë me shtetet demokratike dhe synon anëtarësimin në NATO, dhe duhet të përgatitet ashtu siç përgatitet një shtet bashkëkohor në BE ose prej partnerëve strategjikë në botë”.
Në një kohë kur siguria rajonale mbetet e ndjeshme, ndërtimi i kapaciteteve mbrojtëse të avancuara vlerësohet si domosdoshmëri.
