Muzeu Hebraik në Vlorë do të jetë institucioni më i ri i kujtesës, ku do të prezantohet një histori unike bashkëjetese, besimi dhe shprese mes shqiptarëve dhe hebrenjve.
Muzeu Hebraik Shqiptar, që risjell në kujtesë vlera të çmuara si mikpritja dhe humanizmi ndër shekuj i vlonjatëve, po ngrihet mbi lagjen e dikurshme të hebrenjve dhe ndodhet në sheshin kryesor të qytetit.
Kryeministri Edi Rama ndau sot në rrjetet sociale pamje nga kantieri i Muzeut Hebraik Shqiptar në Vlorë, një ndërtesë që sipas tij, “do të dëshmojë ndër breza historinë e rrallë të bashkëjetesës shqiptare me hebrenjtë, në vitet e errëta të Holokaustit, ku populli ynë shkruajti faqen më të lavdishme të Besës së Tij”.
Duke u ndalur te projekti, Rama tha se ai ndërthur arkitekturën tradicionale me atë bashkëkohore.
“Projekti ruan muret origjinale të ndërtesës, strukturën mbajtëse dhe elementët tipikë arkitektonikë, ndërsa i gjithë procesi do të pasurohet me qasje moderne në dizajn dhe teknologjitë bashkëkohore të ekspozimit”, u shpreh kryeministri, transmeton ATSH.
Muzeu Hebraik Shqiptar do të jetë pjesë e kompleksit kulturor të Vlorës, pasi ndodhet afër tre muzeve të tjerë, Muzeut Kombëtar të Pavarësisë, Muzeut Historik dhe Muzeut Etnografik.
Godina ku po ngrihet ky muze është një ndërtim i fundshekullit të XIX dhe ndodhet në Qendrën Historike të Vlorës.
I projektuar nga studioja e njohur izraelite “Kimmel Eshkolot Architects”, Muzeu Hebraik po realizohet me një financim prej 280 milionë lekësh.
Ky muze do të rrëfejë një historinë shekullore të bashkëjetesës mes shqiptarëve dhe popullsisë hebreje, por edhe do të kthehet në një qendër që gjeneron dialog mbi tolerancën dhe mirëkuptimin mes popujve.
