Prokuroria Speciale e Republikës së Kosovës (PSRK), njofton se ka ngritur aktakuzë ndaj dy të pandehurëve të Komunës së Mitrovicës së Jugut, F.M. dhe H.M., për veprën penale “Keqpërdorim i pozitës apo autoritetit zyrtar”.
Sipas aktakuzës, F.M., në pozitën e nënkryetarit të komunës, dhe H.M., drejtor i Drejtorisë për Gjeodezi, Kadastër dhe Pronë, dyshohen se kanë tejkaluar kompetencat e tyre me qëllim të përfitimit të dobisë pasurore për persona të tretë, duke shkaktuar dëm ndaj pronës publike, thuhet në njoftimin e kësaj prokurorie.
Tutje thuhet se hetimet tregojnë se më 25 prill 2021, të pandehurit, ndonëse kishin dijeni se Kuvendi Komunal kishte shpallur me interes të posaçëm publik një pronë të paluajtshme, e paraqitën për këmbim si pronë komunale. Kjo, sipas Prokurorisë, i shkaktoi Agjencisë Kosovare të Privatizimit (AKP) një dëm prej 125,100 euro.
Përveç kësaj, F.M. akuzohet edhe për veprën penale të “Mosraportimit ose raportimit të rremë të pasurisë, të ardhurave, dhuratave, dobisë tjetër materiale ose detyrimeve financiare”.
Prokuroria Speciale ka propozuar shqiptimin e dënimeve plotësuese ndaj të dy të pandehurve.
