Kryeministri britanik Keir Starmer ka shkarkuar Peter Mandelson nga detyra e ambasadorit të Britanisë në SHBA pas publikimit të korrespondencës së tij me financierin e dënuar Jeffrey Epstein, në të cilën Mandelson e këshillonte Epstein të kërkonte lirim të parakohshëm nga burgu.
Kjo u raportua anëtarëve të parlamentit nga Ministri i Shtetit i Mbretërisë së Bashkuar për Evropën dhe Amerikën e Veriut, Stephen Doutty.
Shkarkimi i Mandelson vjen në prag të një vizite shtetërore në Britani nga Presidenti i SHBA-së Donald Trump, emri i të cilit është përfshirë edhe në skandalin Epstein. Trump pranon se është mik me Epstein, por këmbëngul se i ka prerë lidhjet me të përpara se të akuzohej për herë të parë.
Presioni mbi Mandelson u rrit kur doli në dritë se ai e kishte këshilluar Epstein të luftonte për lirim të parakohshëm në vitin 2008, kur ai po vuante një dënim prej 18 muajsh për nxitjen e një të miture për prostitucion dhe pagesën e një prostitute. Emailet e Mandelson drejtuar Epstein u botuan nga The Sun pasi filluan të qarkullonin në Uashington.
Në një letër të qershorit 2008, të cilën përfaqësuesi i tij nuk e kundërshtoi, Mandelson i shkroi Epsteinit: “Të vlerësoj shumë dhe ndihem i pafuqishëm dhe i tërbuar për atë që ka ndodhur. Ende mezi e kuptoj. Kjo thjesht nuk mund të ndodhte në Mbretërinë e Bashkuar. Duhet të jesh tepër elastik, të luftosh për lirim të parakohshëm dhe të kesh një pikëpamje filozofike për atë që po ndodh.”
Mandelson pranoi se detaje “edhe më të sikletshme” të miqësisë së tij me Epstein mund të dalin së shpejti, ndërsa këmbënguli se nuk ka qenë kurrë dëshmitar i ndonjë shkeljeje nga financieri.
Miqësia midis Mandelson dhe Epstein është rikthyer në vëmendjen e publikut pasi anëtarët demokratë të Komitetit të Mbikëqyrjes dhe Reformës Qeveritare të Dhomës së Përfaqësuesve publikuan përmbajtjen e “librit pesëdhjetëvjeçar” të Epstein, në të cilin Mandelson e quajti atë “miku im më i mirë” në një shënim të shkruar me dorë.
Epstein u akuzua për trafikim seksual. Dyshohet se ai merrte shërbime nga të miturit dhe ua “huazonte” ato njerëzve me ndikim. Epstein u arrestua në vitin 2019 dhe kreu vetëvrasje në qelinë e tij një muaj më vonë.
