Lidhja Demokratike e Kosovës vlerëson se vendimi i Qeverisë në detyrë për ta dërguar z. Besnik Bislimi në Bruksel, në kuadër të dialogut me Serbinë është i pajustifikuar dhe pa asnjë legjitimitet qytetar e institucional.
LDK në një deklaratë për medie bën të ditur se zgjedhjet e 9 shkurtit dhanë një mesazh të qartë nga qytetarët e Kosovës.
Sipas këtij subjekti politik ky vullnet politik nuk i jep mandat Bislimit të përfaqësojë Kosovën në një proces kaq të rëndësishëm dhe vendimtar. Përfaqësimi në dialog mund të bazohet vetëm mbi institucione legjitime të dala nga zgjedhjet dhe të mbështetura nga sovrani.
“Dialogu me Serbinë është proces i ndjeshëm që përcakton të ardhmen e shtetit tonë. Ky proces nuk mund të reduktohet në vendime të njëanshme të një qeverie në detyrë, e cila nuk gëzon më besimin qytetar dhe as shumicën e nevojshme për të marrë përgjegjësi të këtij niveli. Veprime të tilla dëmtojnë kredibilitetin ndërkombëtar të Kosovës dhe rrezikojnë ta cenojnë rrugën tonë euroatlantike”, theksohet në deklaratë.
LDK nënvizon se Kosova ka nevojë për përfaqësim të denjë, të fuqishëm dhe mbi të gjitha legjitim, teksa shton se do të mbrojë me vendosmëri këtë parim, duke theksuar se dialogu nuk mund të udhëhiqet nga improvizime partiake të një qeverie pa mandat.
