EOGHAN McCabe, CEO dhe themelues i Intercom, ka ofruar 500,000 dollarë për të krijuar një mural me imazhin e Irina Zarutska-s, gruas ukrainase, vrasja e së cilës tronditi Shtetet e Bashkuara.
“Po ofroj 500,000 dollarë në grante prej 10,000 dollarësh për të pikturuar murale të Irina Zarutskaya në vende të shquara në qytetet amerikane”, shkroi McCabe në X. Ai i inkurajoi ata që duan të marrin pjesë në iniciativë ose të dhurojnë para të kontaktojnë shefen e stafit të tij, Katie Brenske Tolstedt.
Njoftimi i McCabe tërhoqi vëmendjen e njeriut më të pasur në botë, Elon Musk, i cili ofroi 1 milion dollarë për muralin. Musk më parë ka qenë i zëshëm në lidhje me rastin, veçanërisht mbulimin mediatik të vrasjes dhe reagimin e publikut.
Një person i përfshirë në iniciativë konfirmoi për Fox News se janë duke u zhvilluar negociata me më shumë se 1,000 artistë në të gjithë vendin dhe se është duke u zhvilluar një kërkim për vendet e duhura për muralet.
Publikohet videoja e vrasjes
Irina Zarutska, 23 vjeç, u vra në një sulm të paprovokuar në një tren muajin e kaluar. Vdekja e saj shkaktoi një debat të gjerë rreth sistemit amerikan të drejtësisë dhe krimit në qytetet amerikane.
Një grua 23-vjeçare ukrainase u godit me thikë për vdekje nga një burrë 34-vjeçar i pastrehë me një histori të gjatë shkeljesh ligji dhe problemesh të shëndetit mendor të premten në mbrëmje, më 22 gusht, dhe vajza vdiq në vendngjarje nga plagët e shkaktuara nga thika.
Pamjet e kamerave të sigurisë, të publikuara nga Sistemi i Tranzitit të Zonës së Charlotte-s (CATS), tregojnë Zarutskën duke hipur në tren në orën 9:46 të mbrëmjes, e veshur me një uniformë picerie, e ulur dhe duke parë celularin e saj.
Vetëm katër minuta më vonë, 34-vjeçari Decarlos Brown Jr. nxori një thikë të palosshme, duke e therur tri herë, të paktën një herë në qafë, tha policia.
