NATO njoftoi të premten se po forcon pozicionin e saj mbrojtës në krahun lindor, që kufizohet me Bjellorusinë, Rusinë dhe Ukrainën, me pajisje të reja për të parandaluar agresionin e mundshëm rus pas një inkursioni nga dronët rusë në territorin polak.
Komandanti suprem i aleancës në Europë tha se një operacion i ri, i quajtur Eastern Sentry, do të shtojë pajisje nga Franca, Danimarka, Gjermania dhe Mbretëria e Bashkuar në mbrojtjen ekzistuese ajrore dhe tokësore.
“Çelësi i kësaj është një dizajn plotësisht i ri mbrojtës”, tha gjenerali amerikan, Alexus Grynkewich, për gazetarët në selinë e aleancës në Bruksel.
Avionë luftarakë Rafale nga Franca, F-16 nga Danimarka, një fregatë dhe sisteme mbrojtëse tokësore janë premtuar për këtë operacion.
Grynkewich tha se burimet shtesë do t’i mundësojnë aleancës të “mbushë boshllëqet në vijë” dhe të përqendrojë forcat kudo ku është e nevojshme, duke përmirësuar gjithashtu komunikimin në të gjithë krahun lindor të NATO-s.
Presidenti francez, Emmanuel Macron, tha se do të vendosë tre avionë Rafale në Poloni, ndërsa Britania zbuloi sanksione të reja ndaj të ardhurave nga nafta e Rusisë dhe makinerisë së luftës së saj.
“Siguria e kontinentit europian është prioriteti ynë kryesor. Ne nuk do të dorëzohemi ndaj kërcënimeve në rritje të Rusisë”, shkroi Macron në X. Ai tha se vendosja u diskutua me sekretarin e përgjithshëm të NATO-s, Mark Rutte, dhe kryeministrin britanik, Keir Starmer.
Ministri i Mbrojtjes i Polonisë, Wladyslaw Kosiniak-Kamysz, e përshëndeti operacionin në një postim në X si “parandalim aktiv dhe gatishmëri për të mbrojtur kudo që të jetë e nevojshme”.
