Nisma Socialdemokrate e ka hapur fushatën elektorale për zgjedhjet e 12 tetorit në Prishtinë, nën sloganin ‘Përjetë Kosova’
Kryetari i Nismës Socialdemokrate, Fatmir Limaj, në hapje të fushatës elektorale tha se nga sot do të jenë fshat për fshat, lagje për lagje, për të zbuluar vizionin e tyre e të bashkëbisedojnë me shumë qytetarë të shtresave të ndryshme që tha se kanë halle e shqetësime.
“Shihni atdheun e juaj si amanet të baballarëve tuaj për ta forcuar, për ta nderuar”, u tha Limaj kandidatëve për Kuvende Komunale nga partia që ai drejton.
Lideri i Nismës tha se nga ulëset e kuvendeve komunale, të rinjtë e të rejat përgatiten për të drejtuar shtetin.
“Asambleja komunale është bërthama, është gjeneza e demokracisë, e shtetit, aty është vendi i parapërgatitjes së vajzave e djemve për të drejtuar shtetin, aty fillon kuadri shtetëror i Republikës së Kosovës. Në shumë asamble kanë qenë burra e gra që kanë drejtuar shtetin e Kosovës. Shikoni një moment ku ju do të ktheheni në zërin e atyre që kanë nevojë t’i mbroni, t’i ndihmoni. Fokusimi ynë në bërthamë, në bazë, përcakton dhe tregon se sa e duam vendlindjen, aty ku jemi rritur, ku jemi formuar, ku rrisim fëmijët tanë. Kjo është qasja ndaj atdheut, ndaj komunës”, tha Limaj.
Nisma Socialdemokrate në zgjedhjet lokale garon me afro 400 kandidatë për Kuvende Komunale e 6 kandidatë për kryetarë komunash.
