Nga Dr. Hysni Aliu
Për të mbrojtur themelet e veta, Evropa është e gatshme të hyjë edhe në luftë me SHBA-në, ndaj kuptoni që me planin për copëtimin e Kosovës keni cenuar themelet e saj. Pasojat po i shihni. ”Mos e fusni kokën nën sharrë, sepse është e qartë që sharra do t’ua presë qafën.” Kur njeriu nuk e përdor mendjen, por i përdor këmbët për t’u udhëhequr, atëherë shpesh këmbët të çojnë në humnerë ose në një xhungël nga ku nuk di të dalësh, madje as duke përdorur mendjen. Duke besuar se Haga është Prishtina, ndërsa BE-– Kosovë, dhe se gjyqtarët e prokurorët e saj janë të korruptuar e të shantazhuar, ose të korruptueshëm e të shantazhueshëm si gjyqtarët e prokurorët e Kosovës, ata që nuk shohin më larg se hunda e vet mblidhen bashkë për të protestuar në Hagë, duke rritur mundësinë e fundosjes përfundimtare të atyre që padrejtësisht po mbahen në burg, por edhe duke i dhënë një goditje shtetit të Kosovës. Jo vetëm që kjo protestë është e dëmshme për ata që gjenden në Hagë, por është e dëmshme edhe për imazhin e Kosovës. Sepse ju po protestoni për një ish-president të shtetit të Kosovës i cili po akuzohet për krime lufte. Ju po ua bëni dasmën me tupan Serbisë dhe një reklamë falas kundër Kosovës në mes të Evropës. Ju po protestoni kundër një gjykate evropiane ne mes te Evropës, një qmenduri e llojit të vetë! Unë, me sinqeritetin më të madh njerëzor dhe me dinjitetin tim kombëtar e intelektual, i bëj thirrje familjes së Thaçit që ta kuptojnë se pikërisht këta që po vijnë për t’ju vizituar dhe për të protestuar në Hagë – një pjesë me vetëdije dhe pjesa tjetër pa vetëdije – janë duke punuar kundër jush, kundër familjes suaj dhe kundër idealeve për të cilat ju dhe UÇK-ja luftuat. Kuptoni se Thaçin nuk e çuan në Hagë krimet e pretenduara, por pikërisht përkrahja e planit për ndarjen e Kosovës. Një plan që përkrahej nga Grenell, një lobist proserb i dëshmuar, sepse ky plan dridhte themelet e Evropës duke ofruar mundësinë për copëtimin e Evropes në të njëjtën mënyrë siç Grenell me Serbinë donte ta copëtonte Kosovën. Fatkeqësisht ish-presidenti Thaçi besoi verbërisht në Grenell dhe Trump, sepse besonte në SHBA ashtu siç beson tërë kombi shqiptar me të drejtë. Z. Thaçi nuk e kuptonte që Kosova prapëseprapë është Evropë, edhe pse ka në zemër edhe SHBA-në. Thaçi nuk e kuptonte që plani i Grenell lidhej me planin e Rusisë për aneksimin e territoreve ukrainase, praktikë e cila nga Kosova, Serbia e Rusia, do të përhapej me të drejtë në tërë Evropën. Arrestimi i z. Thaçi nuk u bë për më shumë se 20 vite të qenurit në politikë – madje ai ishte i preferuari i Evropës dhe Amerikës – por ndodhi pikërisht në kohën kur po nisej për në Shtëpinë e Bardhë për të nënshkruar marrëveshjen për copëtimin e Kosovës (u kthye nga Vjena e pastaj u arrestua).Njerëzit që kanë pak mend, pyesin: pse pikërisht rrugës për në SHBA, ku e priste presidenti i atëhershëm? Z. Thaçi dhe familja e tij, ju lus ta kuptoni që Haga, me gjyqtarët dhe prokurorët e saj, janë miqtë e juaj e nuk janë armiqtë tuaj, por mund të bëhen armiqtë tuaj nëse lejoni që këmbët ta udhëheqin kokën dhe jo mendja. Po them se janë miqtë tuaj, sepse gjyqësia dhe prokuroria evropiane nuk janë të manipulueshm, e as të korruptueshme, e as të ndikueshëm – ndaj mos u jepni arsye për t’ju dënuar. Kuptoni që Evropa e mbron kontinentin e vet në çdo kusht dhe me çdo çmim dhe me qdo mjet! Largimi i PDK-së dhe LDK-së nga idetë për copëtimin e Kosovës, edhe me vepra dhe jo vetëm me fjalë, do ta fundoste përfundimisht arsyen që z. Thaçi të qëndrojë në Hagë. Së këndejmi, nëse këto dy parti e duan z. Thaçin, le të largohen nga idetë e Grenellit me shokë. Ashtu siç e dha intervistën per nje TV nga Haga, z. Thaçi duhet të dërgojë mesazhin që ajo që kanë besuar e tentuar ka qenë gabim, dhe se partia që e ka udhëhequr vetë, do ta ndryshojë qasjen ndaj kësaj teme edhe në mënyrë faktike, duke qëndruar përkrah Evropës edhe me çmimin që të përkrahin kundërshtarët e vet politikë në Kosovë. Kjo do të sillte dritë per z. Thaqin, dritë per familjen e ti por edhe drite, paqe e prosperitet për Kosovën!
Opinioni i pavarur jo domosdoshmërisht paraqet politkën editoriale te Kosovatimes.
