Katër mijë studentë pritet që nga 1 tetori kur nisë viti i ri akademik në Kosovë do të kenë mundësinë të qëndrojnë në Qendrën e Studentëve e të ushqehen në mensë. Përveç kësaj edhe 1500 studentë të tjerë që nuk janë banorë në konvikte, do të kenë mundësinë që të ushqehen në mensë.
Këtë e bëri të ditur ministrja në detyrë e Arsimit, Arbërie Nagavci pas vizitës që pati në Qendrën e Studentëve në Prishtinë.
Sipas saj, ata që do të bëhen banorë të konvikteve do ta marrin vesh më 26 shtator kur pritet të publikohen edhe rezultatet, e do të fillojnë të vendosen nga 1 tetori.
“Në bazë të komunikimit që kemi pasur me Qendrën e Studentëve konkursi do të hapet për regjistrimin e 4 mijë studentëve të cilët do të kenë qëndrim të plotë, fjetje dhe ushqim. Përpos kësaj, Qendra ka potencial për të ofruar mundësinë edhe për 1500 studentë që të ushqehen në kuadër të Qendrës. Kushtet janë shumë të mira, Qendra ka bërë përgatitjet e nevojshme, prej këtyre 4 mijë studentëve që do të pranohen 70 për qind e tyre janë kapacitete për vajzat që do të regjistrohen si studentë, dhe për shkak të mbështetjes së vazhdueshme që e marrin”, deklaroi ajo.
Nagavci, tha se pagesa për konvikte e mensë do të jetë simbolike.
“Vlera e çmimit që do të paguajnë studentët është simbolike, është 20 euro pagesa mujore për qëndrimin e studentëve që rrinë, dhe 15 euro për shujtat. Siç u njoftova rezultate do të bëhen publike me 26 shtator dhe nga 1 tetori do të fillojë vendosja e studentëve në konvikte”, deklaroi tutje, Nagavci.
Ministrja në detyrë u pyet edhe për ankesat e disa prindërve të cilët ende nuk i kanë marrë mjetet nga MASHTI për blerjen e mjeteve shkollore.
“Arsyeja se pse disa prindër kanë pasur vonesa në pranim të mjeteve ka qenë për shkak se sivjet janë konfirmuar nga koordinatorët shkollor secili prej aplikimeve në mënyrë që të mos ketë asnjë abuzim”, tha ajo.
E pyetur se sa prindër kanë keqpërdorur subvencionimin një vit më parë, Nagavci nuk foli me shifra, por tha se rastet i kanë adresuar në organet kompetente.
“Zyrtarët e MASHTI-t kanë pasur komunikim direkt me prindër që të kthehet pagesa, ndërkaq të tjerat janë adresuar qoftë në komunë, qoftë në organet kompetente në mënyrë që të mos abuzohet asnjë cent. Ju e dini në vitin e kaluar secili prej prindërve ka konfirmuar që është prind apo kujdestar i fëmijës që ndjekë shkollimin në Kosovë dhe se këto mjete do t’i përdorë për atë qëllim. Sivjet kemi vendosur edhe një siguresë shtesë, koordinatorët në nivel shkollash kanë konfirmuar secilin aplikacion. Deri para një jave ka qenë rreth 3 mijë numri i atyre që kanë aplikuar e nuk janë konfirmuar nga koordinatorët shkollor”, bëri të ditur Nagavci.
Ndërkohë, kur u pyet për shtëpitë botuese që janë evidentuar se kanë pasur mbivendosje të tiketave në çmime të librave, Nagavci tha se për këtë çështje inspektorët kanë dalë në terren.
“Ka qenë një shtëpi botuese ku ka pasur mbivendosje të tiketave në çmime. Ne si ministri, si dhe MINT-i përmes inspektorëve dhe mekanizmave që kanë në kuadër të ministrisë kanë bërë monitorimet dhe kanë filluar masat sipas legjislacionit në fuqi. Inspektorati ka pasur vizita në komuna të ndryshme dhe i ka parë nga afër të gjitha rastet e abuzimit, dhe natyrisht nuk do të tolerohet asnjë abuzim. Po sipas legjislacionit në fuqi do të merren masat ndaj atyre që kanë bërë shkelje”, deklaroi ministrja në detyrë e Arsimit, Arbërie Nagavci.
