Prokuroria Themelore në Prishtinë, ka bërë të ditur se sot, me vendim të Prokurorit të Shtetit, janë ndaluar për 48 orë tre persona të dyshuar për veprën penale “Falsifikimi i dokumentit zyrtar”, nga neni 427 i Kodit Penal të Republikës së Kosovës.
“Të ndaluarit janë personat me inicialet A.F dhe G.M, të cilët janë të lidhur me Autoshkollën “STOP”, si dhe M.TH, i dyshuar nga Kryqi i Kuq i Kosovës, Dega në Fushë Kosovë. Ndërkohë, e dyshuara tjetër me inicialet A.A, po ashtu nga Kryqi i Kuq, Dega në Fushë Kosovë, është liruar në procedurë të rregullt: thuhet në njoftim
Sipas njoftimit, ky aksion është ndërmarrë në bashkëpunim të ngushtë me hetuesit policor të Sektorit për Hetimin e Korrupsionit në Drejtorinë për Hetimin e Krimeve Ekonomike dhe Korrupsionit (DHKEK) në Prishtinë dhe paraqet vazhdimësi të hetimeve të mëparshme, në të cilat ishin arrestuar një instruktor i autoshkollës dhe një ekzaminer i Ministrisë së Mjedisit, Planifikimit Hapësinor dhe Infrastrukturës.
Sipas Prokurorisë, të dyshuarit dyshohet se kanë qenë të përfshirë në veprimtari të paligjshme që lidhen me falsifikimin e dokumenteve zyrtare.
Prokuroria e Shtetit ka theksuar përkushtimin e saj të vazhdueshëm për luftimin e korrupsionit dhe veprave penale, si dhe ka garantuar se do të ndërmerren të gjitha masat e nevojshme ligjore për të çuar para drejtësisë çdo person të përfshirë në aktivitete kriminale.
