Tre oficerë policie u vranë dhe dy të tjerë u plagosën rëndë në Pensilvani në një konfrontim me një sulmues të armatosur, i cili më pas u qëllua për vdekje nga policia, thanë zyrtarët.
Të shtënat ndodhën në Codorus Township në Pensilvaninë juglindore, ndërsa oficerët u kthyen në vendngjarje për të vazhduar një hetim që kishte filluar një ditë më parë, tha Komisioneri i Policisë së Shtetit Christopher Paris në një konferencë për shtyp disa orë pas incidentit.
Ai nuk pranoi të jepte detaje të mëtejshme, përveçse e përshkroi hetimin si “të lidhur me marrëdhëniet familjare”.
Oficerët e policisë të vrarë
Tre oficerë policie u vranë, ndërsa dy nga të plagosurit u transportuan në një spital aty pranë, ku mjekët e vlerësuan gjendjen e tyre si kritike, por të qëndrueshme.
Të paktën një media lokale raportoi se oficerët po përpiqeshin të zbatonin një urdhër kërkimi kur ndodhën të shtënat.
Paris deklaroi se sulmuesi u qëllua nga policia. I dyshuari nuk është identifikuar publikisht dhe autoritetet ende nuk kanë zbuluar se cilave agjenci u përkisnin policët e rënë.
Reagimi i Guvernatorit
Guvernatori Josh Shapiro vizitoi spitalin për të nderuar oficerët e rënë.
“Kjo është një ditë absolutisht tragjike dhe shkatërruese për Qarkun e Jorkut dhe të gjithë shtetin e Pensilvanisë. Është e rëndësishme të dimë se këto familje, të cilat tani janë në zi, janë jashtëzakonisht krenare për të dashurit e tyre që veshën uniformën për të na mbrojtur”, tha ai, duke bërë thirrje për lutje për familjet e viktimave.
Shapiro konfirmoi gjithashtu se mori një telefonatë nga Prokurorja e SHBA-së Pam Bondi, e cila ofroi të gjithë ndihmën e nevojshme federale.
