Kreu në largim i shërbimit britanik të inteligjencës MI6, Richard Moore, tha se presidenti rus Vladimir Putin po gënjen kur pretendon se fitorja e Rusisë në luftën me Ukrainën është e pashmangshme.
“Thënë troç, Putini e teproi me të gjitha mënyrat. Ai mendoi se do të fitonte lehtë. Por ai – dhe shumë të tjerë – i nënvlerësuan ukrainasit”, tha Moore në një fjalim të mbajtur në Turqi, ku shërbeu si ambasador britanik nga viti 2014 deri në vitin 2017. Teksti i plotë i fjalimit është botuar në faqen e internetit të qeverisë britanike.
Richard Moore theksoi se vuajtjet e agresorit nuk mund të barazohen me ato të viktimave, por është e qartë se shpërfillja e Putinit për jetën njerëzore shtrihet edhe tek populli i tij. Rusia ka pësuar tashmë mbi një milion viktima, një e katërta e të cilave janë të vdekur, pasi ushtarë të trajnuar dobët nga rajonet më të varfra të vendit dërgohen në front.
Moore vuri në dukje dëshirën e Presidentit të SHBA-së Donald Trump për të zgjidhur konfliktin, gatishmërinë e Presidentit ukrainas Volodymyr Zelenskyy për të bërë kompromise të vështira dhe përpjekjet e udhëheqësve evropianë që kërkojnë një paqe të drejtë dhe të qëndrueshme. Megjithatë, vuri në dukje Moore, nuk ka prova që Putini është i interesuar në bisedime paqeje, përveç nëse ato përfshijnë kapitullimin e plotë të Ukrainës. Ai vazhdon të negociojë vetëm për sy e faqe, beson Moore. Putin mohon të drejtën e Ukrainës për të ekzistuar si shtet i pavarur.
Moore theksoi se Putini e mbivlerësoi forcën e tij dhe e nënvlerësoi rezistencën ukrainase. Në të njëjtën kohë, veprimet e Putinit forcuan identitetin kombëtar të Ukrainës, përshpejtuan integrimin e saj me Perëndimin dhe i shtynë Suedinë dhe Finlandën drejt anëtarësimit në NATO.
Moore vuri në dukje se Putini po përpiqet ta bindë botën për pashmangshmërinë e fitores së Rusisë, por kjo është një gënjeshtër. Ai po gënjen botën, popullin e tij dhe ndoshta veten, duke thënë pothuajse në mënyrë refleksive vetëm atë që mendon se njerëzit duan të dëgjojnë.
Richard Moore kujtoi se në vitin 2022, SHBA-të dhe Mbretëria e Bashkuar ndërmorën një hap të paprecedentë: deklasifikimin e inteligjencës që ekspozonte gënjeshtrat e Putinit dhe zbulonte planet e pushtimit. Kjo minoi fushatën e dezinformimit të Rusisë, ngadalësoi përparimin e saj dhe mobilizoi mbështetjen ndërkombëtare për Ukrainën.
Sipas Moore, Putin po i vë ambiciet personale mbi interesat e vendit, duke e çuar ekonominë dhe demografinë e Rusisë në rënie. Ai po investon në programe ushtarake në vend të infrastrukturës, arsimit dhe kujdesit shëndetësor. Nëse bashkësia ndërkombëtare tregon përmbajtje, Putini do të përballet me një zgjedhje: ose të rrezikojë një krizë të brendshme që kërcënon pushtetin e tij, ose të arrijë një marrëveshje të arsyeshme, beson shefi i MI6.
Mbështetja e jashtme – nga Irani, Koreja e Veriut dhe Kina – i lejoi Rusisë ta vononte këtë zgjedhje. Megjithatë, sipas Moore, paqja do të ishte e dobishme edhe për qytetarët rusë. Ai theksoi se qeveria britanike dhe agjencitë e inteligjencës nuk janë armiqësore ndaj Rusisë si vend, por vetëm po kundërshtojnë veprimet e Kremlinit.
“Putini nuk është Rusia dhe jo të gjithë rusët i mbështesin politikat e tij. Disa rezistojnë hapur, si Alexei Navalny, ndërsa të tjerë veprojnë fshehurazi, duke bashkëpunuar me agjencitë ndërkombëtare të inteligjencës”, përfundoi Richard Moore, i cili do t’ia dorëzojë detyrat e tij si kreu i MI6 në ditët në vijim Blaze Metreveli-t, gruaja e parë që mban këtë post.
Në të njëjtin fjalim, Moore njoftoi lançimin nga MI6 të një portali të dedikuar për rrjetin e errët me shpresën e tërheqjes së agjentëve të rinj, veçanërisht nga Rusia. Ministria e Jashtme e Mbretërisë së Bashkuar deklaroi se platforma e mesazheve të sigurta, Silent Courier, është projektuar për të forcuar sigurinë kombëtare duke thjeshtuar procesin e rekrutimit të agjencisë.
