Nga Vladimir Muçaj
Shkarkimi i kryetarit të Bashkisë së Tiranës, Erion Veliaj, pas deklaratës së qartë të kryeministrit Edi Rama në Asamblenë Kombëtare të PS-së, duket se po merr një drejtim të pakthyeshëm. Megjithatë, përpara se ky proces të marrë vulën e vendimit politik e institucional, mbetet një kërkesë thelbësore që duhet trajtuar me seriozitet: Erion Veliaj duhet të ketë të drejtën të dëgjohet nga Këshilli Bashkiak i Tiranës – një hap minimal për të garantuar standardet demokratike dhe respektimin e procedurave ligjore.
Kushtetuta e Republikës së Shqipërisë dhe ligji për vetëqeverisjen vendore janë të qarta: asnjë funksionar publik nuk mund të shkarkohet pa u dëgjuar më parë, veçanërisht nëse ndaj tij ende nuk ka një vendim penal të formës së prerë. Fakti që Veliaj ndodhet aktualisht në paraburgim nuk përbën asnjë pengesë ligjore që ai të mos thërritet në një seancë dëgjimore pranë Këshillit Bashkiak. Mungesa e tij nuk është e qëllimshme, por pasojë e një mase sigurie që nuk i heq atij statusin e pafajësisë, të paktën deri në përfundimin e procesit gjyqësor.
Në një demokraci funksionale, procedurat janë po aq të rëndësishme sa vetë vendimet. Në këtë kontekst, thirrja e tij për t’u dëgjuar nga këshilltarët – si të mazhorancës, ashtu edhe të opozitës – nuk është një akt favorizimi, por një detyrim ligjor dhe moral. T’i mohosh këtë të drejtë do të ishte një precedent i rrezikshëm që cenon parimin e barazisë para ligjit dhe përforcon perceptimin se drejtësia dhe politika mund të veprojnë në boshllëk institucional.
Autoritetet gjyqësore dhe prokuroria kanë mundësinë të autorizojnë një leje të përkohshme për paraqitjen e Veliajt në këtë seancë. Një leje e tillë është plotësisht e justifikueshme, njësoj si në rastet kur paraburgosurit lejohen të marrin pjesë në ceremoni familjare fatkeqe. Kërkesa për një dëgjesë nuk bie ndesh me asnjë standard ligjor – përkundrazi, i shërben transparencës dhe fuqizon besimin publik në institucionet përfaqësuese.
Në fund të ditës, nuk është çështje nëse Veliaj është fajtor apo i pafajshëm – këtë do ta vendosë gjykata. Por para se të vendosin politikisht për shkarkimin e tij, këshilltarët bashkiakë duhet të dëgjojnë fjalën e njeriut që kanë votuar për kryetar bashkie. Vetëm kështu, pavarësisht vendimit përfundimtar, procesi do të jetë i ndershëm dhe legjitim në sytë e qytetarëve të Tiranës dhe më gjerë.! Kaq e thjeshtë është!….
