Sektori i Sigurisë në Qendrën Korrektuese të Dubravës, sot rreth orës 08:50, ka realizuar një aksion kontrolli dhe bastisjeje në zonën e bujqësisë të institucionit, konkretisht tek serat, pas pranimit të informacioneve të besueshme për tentim-kontrabandë.
Sipas njoftimit, gjatë kontrollit, rreth 20 metra larg murit të jashtëm të institucionit, zyrtarët korrektues kanë hasur në dy paketime të dyshimta, të mbështjella me qese najloni.
“Pas hapjes së tyre janë gjetur: katër telefona mobil, katër adapterë për mbushjen e telefonave, dy palë kufje, si dhe dy paketime të tjera të mbështjella me substancë të dyshuar narkotike, me peshë totale prej 10 gramësh së bashku me mbështjellësin”, thuhet në njoftim.
Tutje theksohet se të gjitha materialet janë konfiskuar dhe proceduar sipas rregullave ligjore, ndërkohë që është njoftuar edhe Policia e Kosovës, e cila ka nisur hetimet për zbardhjen e rastit.
Shërbimi Korrektues i Kosovës rithekson përkushtimin për të parandaluar çdo përpjekje për kontrabandë dhe për të garantuar sigurinë dhe rendin në të gjitha institucionet korrektuese të vendit.
