Një pjesë e rrugës përpara Spitalit Vajira në kryeqytetin tajlandez Bangkok u shemb këtë mëngjes, duke krijuar një gropë 30 metra të gjatë, 30 metra të gjerë dhe 50 metra të thellë. Për fat të mirë, askush nuk u lëndua, raporton Bangkok Post .
Trafiku është i mbyllur në atë zonë për arsye sigurie. Shërbimet ambulatore në spitalin shtetëror u pezulluan dhe rreth 3,500 pacientë u evakuuan nga ndërtesat aty pranë. Raporti fillestar thotë se ndërtesat e spitalit nuk janë dëmtuar.
Banorëve të apartamenteve aty pranë iu dha gjithashtu urdhër të evakuoheshin. Dy shtylla elektrike dhe një automjet policie ranë në gropë pas shembjes. Autoritetet nuk thanë se çfarë e shkaktoi shembjen. Guvernatori i Bangkokut, Chadchart Sittipunt, dhe një ekip zyrtarësh po inspektonin vendin e ngjarjes.
U ndërpre uji dhe energjia elektrike
Sittipunt më vonë tha se shembja ndodhi mbi një stacion treni nëntokësor, konkretisht në kryqëzimin midis tunelit dhe stacionit. “Toka përfundoi në tunel, duke shkaktuar shembjen e strukturave përreth dhe shpërthimin e një tubi të madh uji”, tha guvernatori.
Autoritetet ndërprenë ujin dhe energjinë elektrike për të kontrolluar situatën dhe për të parandaluar rreziqe të mëtejshme. Masa të tjera emergjente të urdhëruara përfshinin vlerësimin e sigurisë së ndërtesave përreth, monitorimin e lëvizjeve të tokës dhe menaxhimin e trafikut në zonë.
Spitali qeveritar pezulloi shërbimet ambulatore për dy ditë. Shërbimet për pacientët e shtruar në spital mbetën funksionale. “Spitalet e tjera nën administrimin e Bangkokut do të jenë në dispozicion për rastet ambulatore gjatë kësaj periudhe”, tha guvernatori.
