Komisioni i Pavarur i Mediave ka urdhëruar ndërprerjen e transmetimit të një spoti politik të Listës Serbe gjatë fushatës zgjedhore, pasi ka konstatuar se përmbajtja e tij bie ndesh me Kodin e Etikës dhe rendin kushtetues të Republikës së Kosovës.
Sipas raportit të monitorimit të datës 22 shtator 2025, televizioni TV Puls më 18 shtator, nga ora 17:10, ka transmetuar një spot politik të Listës Serbe me përmbajtjen: “Çdo ditë, populli me të drejtë pyet, si ta durojmë terrorin, si ta rivendosim lirinë, si t’i mbajmë fëmijët këtu, si të mbijetojmë?”.
KPM ka konstatuar se përdorimi i shprehjeve “si ta durojmë terrorin” dhe “si ta rivendosim lirinë” përbën gjuhë që bie ndesh me rendin kushtetues të Kosovës. Për këtë arsye, Zyra Ekzekutive e KPM-së i ka dërguar TV Puls një njoftim zyrtar për shkelje, duke e udhëzuar që menjëherë të ndërpresë transmetimin e përmbajtjeve të tilla.
Ky vendim bazohet në nenin 11, paragrafi 2, të Kodit të Etikës KKPM-2016/03, ku përcaktohet se: “Në raste të veçanta, kur një OSHM përmes programit të vet nxit veprime që cenojnë interesin nacional dhe sigurinë e përgjithshme, KPM do të urdhërojë OSHM-në që menjëherë ta ndërpresë transmetimin e përmbajtjeve të tilla. Transmetimi i përmbajtjeve të tilla mund të rezultojë me ndërprerje të licencës së OSHM-së, në pajtim me Ligjin e KPM-së”, thuhet në përgjigjen e KPM-së.
KPM ka theksuar se edhe në fushatat zgjedhore të mëparshme ka ndërmarrë veprime të ngjashme, duke kërkuar nga mediat që të ndërpresin spotet politike me gjuhë që cenon rendin kushtetues dhe publik në Kosovë.
