Bota e futbollit është tronditur nga vdekja e sulmuesit të ri anglez, Billy Vigar, i cili ndërroi jetë në moshën 21-vjeçare pas një lwndimi të rëndë në tru gjatë një ndeshjeje të fundjavës së kaluar.
Vigar, lojtar i Chichester City, u përplas tragjikisht me një sipërfaqe të fortë pranë fushës në minutën e 15-të të ndeshjes kundër Wingate & Finchley në kuadër të Premier Division të Isthmian League.
Pas incidentit, ndeshja u ndërpre menjëherë dhe ai u transportua me helikopter në spital, ku iu nënshtrua një operacioni dhe u mbajt në koma të induktuar. Megjithatë, dëmtimi i trurit ishte fatal dhe ai ndërroi jetë të enjten në mëngjes.
Familja e tij publikoi një deklaratë duke shprehur dhimbjen për humbjen tragjike:
“Pas lëndimit të rëndë të shtunën, Billy u vendos në koma të induktuar dhe iu nënshtrua një operacioni për të ndihmuar procesin e shërimit. Por dëmtimi ishte shumë i rëndë dhe ai ndërroi jetë të enjten në mëngjes.”
Mes ngushëllimeve të shumta ishte edhe klubi londinez Arsenal, ku Vigar kishte kaluar një pjesë të karrierës së tij të hershme.
“Të gjithë në Arsenal jemi thellësisht të pikëlluar për vdekjen tragjike të ish-lojtarit tonë të akademisë, Billy Vigar. Përveç talentit të tij të madh, ai do të mbahet mend për dashurinë ndaj lojës dhe karakterin e tij të jashtëzakonshëm.”
Billy Vigar iu bashkua akademisë së Arsenalit në moshën 14-vjeçare dhe në korrik të vitit 2022 nënshkroi kontratën e tij të parë profesionale. Ai luajti për ekipin U21 të Arsenalit dhe pati huazime te Derby County.
