Dogana e Kosovës thotë se ka parandaluar 15 raste të përpjekjeve për kontrabandë në Aeroportin Ndërkombëtar “Adem Jashari” në Prishtinë, e kjo sipas tyre u bë në kuadër të kontrolleve rutinore në zonën e arritjes në ANP, vlera e të cilave mallra, sipas Doganës së Kosovës, tejkalon shumën prej 60 mijë euro.
“Ndër mallrat më të shpeshta përfshihen: -Telefona të llojit iPhone 17 Pro Max, rreth 33 copë; -Parfume origjinale të importuara pa deklarim përkatës;- Pjesë të ndryshme për automjete, të padeklaruara; – Mosdeklarim i mjeteve monetare mbi 10,000 €, ku 25% e shumës është konfiskuar në përputhje me dispozitat ligjore. Vlera e përgjithshme e mallrave të identifikuara në këto raste tejkalon shumën prej 60,000 euro”, thuhet në njoftimin e Doganës së Kosovës.
Dogana thotë se vazhdon zbatimin e kontrolleve të shtuara në aeroport, si ndaj udhëtarëve ashtu edhe ndaj mallrave të transportuara përmes kargos, me qëllim mbrojtjen e tregut dhe interesit ekonomik të vendit.
Ata kanë ftuar qytetarët dhe udhëtarët që të respektojnë obligimet ligjore për deklarimin korrekt të mallrave dhe mjeteve monetare gjatë hyrjes apo daljes nga territori i Republikës së Kosovës.
