Në edicionin e 14-të të Festivalit mbarëkombëtar “Teuta” që u mbajt në Qendrën e Kulturës në Tetovë, ansamble të ndryshme shqiptare promovuan magjinë e këngës së vjetër qytetare.
Të gjitha këngët e interpretuara u pritën me duartrokitje nga publiku i pranishëm në sallë.
“Sonte ishte një natë e magjishme, një natë mbresëlënëse dhe do të mbetet në memorien tonë afatgjate, për shkak se Tetova, si hera e parë që performojmë na priti jashtëzakonisht bukur”, tha Edri Stavileci nga grupi “Rilindja” Gjakovë.
“Kësaj radhe jemi paraqit nën përcjellje të orkestrës së Preshevës, gjë që më herët nuk e kemi pas. I kemi pas katër këngë. Ka qenë “Kosovarja e bukur”, e kemi prezantuar në një far forme veten se vijmë prej Prishtine, kënga e dytë ishte “Veleshtarja” që i takon këtij rajoni dhe kënga e tretë ishte “Ti më je si një gonxhe” dhe e fundit për shenjë respekti “Moj e hollë e gjatë”,”, tha Naza Sadiku nga kori “Nexhmije Pagarusha”, Prishtinë.
Ky edicion kishte një rëndësi të veçantë, pasi përkon me 20-vjetorin e themelimit të Korit të Grave “Teuta” nga Tetova .
“Ne gjithmonë pritemi shumë bukur nga publiku tetovar,jo vetëm këtu por kudo që kemi qenë na kanë pritur shumë mirë,ngase kanë një respekt të veçantë,meqë ne të gjitha jemi të moshuara. Dhe kur të del shtata përpara,është shumë mirë kur ti vazhdon të sillesh me veten dhe kjo na mban dhe na rinon”, shtoi Flora Kasapi anëtare e grupit të grave “Teuta”.
Festivali, pos artdashësve mblodhi edhe figura të institucioneve të nivelit qendror dhe atij lokal.
