Policia e Kosovës ka njoftuar se janë iniciuar disa raste të hetimeve për vdekje në rrethana të ndryshme në komuna të ndryshme të vendit.
Sipas policisë në Istog, është raportuar se një person është gjetur pa shenja jete në shtëpinë e tij. Në vendin e ngjarjes kanë dalë të gjitha njësitë përkatëse, përfshirë ekipin mjekësor, i cili ka konstatuar vdekjen. Me urdhër të prokurorit, trupi i pajetë është dërguar në Institutin e Mjekësisë Ligjore (IML) për obduksion.
Një rast tjetër është raportuar në Pejë, ku viktima kishte rënë në një pusetë. Pas ndërhyrjes disa orëshe të njësive emergjente, trupi i viktimës është nxjerrë, por ai fatkeqësisht ishte pa shenja jete. Edhe në këtë rast, me vendim të prokurorit, trupi është dërguar në IML për obduksion.
Në Prizren, është raportuar për një viktimë grua me shtetësi të huaj, e cila është gjetur pa shenja jete. Njësitë policore dhe ekipi mjekësor kanë dalë në vendin e ngjarjes, ku është konstatuar vdekja. Trupi i saj është dërguar për obduksion me vendim të prokurorit.
Ndërkohë, në Podujevë, është raportuar se një person është gjetur pa shenja jete. Në vendin e ngjarjes është gjetur dhe konfiskuar një armë zjarri e tipit AK-47, me një karikator, pesë fishekë dhe shtatë gëzhoja. Autoritetet përkatëse kanë dalë në vendin e ngjarjes dhe me vendim të prokurorit, trupi i pajetë është dërguar në IML për obduksion.
Policia e Kosovës ka njoftuar se të gjitha rastet janë duke u trajtuar si hetime mbi vdekjen dhe janë në koordinim me prokurorinë për ndriçimin e plotë të rrethanave
