Kryetari i Komunës së Drenasit, Ramiz Lladrovci ka reaguar pas publikimit të një audio-incizimi, ku përmenden miliona euro dhe prona komunale. Ai tha se nuk shantazhohet dhe se incizimi është, siç u shpreh, i “prerë dhe i sakatuar”.
Në një konferencë për media, Lladrovci theksoi se vendimet i merr gjykata dhe se komuna ndjek procedurat ligjore. Sipas tij, çdo marrëveshje për pronat komunale duhet të kalojë përmes Kuvendit të Komunës.
“Vendos gjykata sipas vendimit të saj dhe ne i ndjekim procedurat. Për fat të keq, gjykata ka vazhduar këto procedura me shmangien e detyrës së saj. Çdo vendim e pranoj, por kur nuk pajtohem, i ndjek procedurat. Problemi kryesor i këtij incizimi është një pronë ku pronarët kanë provuar të më shantazhojnë. Por unë nuk shantazhohem”, tha Lladrovci.
Audio-incizimi është publikuar nga VOX Kosova dhe përfshin një bisedë mes kryetarit Lladrovci dhe biznesmenit Labinot Halilaj, kandidat për Asamblenë Komunale në listën “Për Drenasin Kampion”, e themeluar së fundmi nga vetë Lladrovci.
Sipas raportimeve, incizimi dyshohet se është bërë mes muajve shtator dhe nëntor të vitit 2024. Në të, flitet për ndërtimin e rreth 40 mijë metrave katrorë pa leje në Komunën e Drenasit, ndërsa përmenden edhe mundësitë për mbindërtime.
Në bisedë, Lladrovci shihet duke këmbëngulur se projekti sjell përfitime të mëdha financiare, duke i përllogaritur Halilajt fitime prej disa milionë eurosh. Në fund, ai shpreh interesimin që edhe vetë të përfshihet në projekt, të cilin e vlerëson me një përfitim prej rreth 15 milionë eurosh.
Ndërkohë, kryetari i Drenasit ka ftuar organet kompetente që të sigurojnë incizimin e plotë, duke theksuar se rasti tashmë është në proces hetimor.
