Partia Demokratike e Kosovës ka nisur fushatën për zgjedhjet lokale në Lipjan, duke kërkuar besimin e qytetarëve për të qeverisur sërish me kandidatin e saj për kryetar, Shukri Buja.
Gjatë hapjes së tubimit, para qytetarëve u prezantua një video përmbledhëse me premtimet e Bujës për katër vitet e ardhshme, ndërsa më pas u prezantua edhe lista e kandidatëve për Asamblenë Komunale me bartës Shukri Bujën.
Kryetari i PDK-së, Memli Krasniqi, në fjalën e tij për qytetarët, theksoi se Shukri Buja ka treguar aftësi punuese dhe eksperiencë në sjelljen e investimeve gjatë mandatit të tij si kryetar. Ai theksoi se qytetarët e Lipjanit kanë nevojë për udhëheqës që punon dhe nuk merret vetëm me marketing.
“Shukri Buja nuk tërhiqet para sfidave, e ka dëshmuar në luftë dhe edhe në qeverisje. E keni parë edhe në debate, është njeri i drejtë, i qasshëm për të gjithë”, deklaroi Ktasniqi.
Kandidati për kryetar të Lipjanit, Shukri Buja, tha se fokusi i tij është të sjellë ndryshime konkrete dhe të prekshme për qytetarët. Ai shtoi se ka kaluar shumë kohë në teren për të identifikuar problemet dhe për të vizituar lagjet dhe fshatrat e komunës.
“Ne do ta bëjmë qytetin modern. Lumi Sitnica mund të kthehet në një atraksion të pasur dhe të shfrytëzohet për qytetarët, ndërsa do të ndërtojmë shkolla të reja dhe do të përmirësojmë infrastrukturën”, tha Buja.
Gjatë tubimit, folën edhe disa kandidatë për asamblistë nga radhët e PDK-së, të cilët premuan investime në infrastrukturë, trafik urban dhe ndërurban, rikthim të tregut të gjelbër, parkingje nën tokë, sallë sporti, pishina dhe mësim të rregullt për fëmijët e moshës 0–5 vjeç.
Në tubim morën pjesë edhe përfaqësues të partive tjera që në zgjedhjet e 12 tetorit garojnë në koalicion me PDK-në në Lipjan.
