Përfaqësuesit e Flotiljes Globale Sumud që lundrojnë drejt Gazës mbajtën një konferencë për shtyp ku folën për sulmet e reja izraelite ndaj anijeve.
Anëtarët e ekuipazhit, Thiago Avila dhe Lisi Proenca, deklaruan se izraelitët sulmuan edhe anijet e tyre gjatë natës.
“Ushtria izraelite po përpiqej të zhvillonte luftë psikologjike në disa pjesë të flotiljes ndërsa i rrethonte. Ata na ndërprenë lidhjen, gjë që ndikoi në transmetimet e drejtpërdrejta dhe sistemet e komunikimit. Gjithashtu patëm një problem me navigimin. Anija ‘Alma’ pësoi dëme strukturore”, tha Avila.
“Pasi anija izraelite u largua nga zona përreth ‘Almës’, ajo iu afrua Siriusit dhe i doli përpara. Nuk krijoi kontakt të drejtpërdrejtë, por u rrotullua rreth tij për një farë kohe. Kjo zgjati 15 minuta. Komunikimet e anijes u ndërprenë në atë moment”, shpjegoi ajo.
Marie Mesmeur, një deputete franceze nga partia e ekstremit të majtë LFI e cila është në bordin e Sirius, tha se pa të paktën dy anije të paidentifikuara, njëra prej të cilave ishte shumë afër.
Flotilja Global Sumud ndodhet afërsisht 275 kilometra nga Gaza, e cila përfaqëson një “zonë me rrezik të lartë” duke pasur parasysh kontrollin e Izraelit mbi zonën.
