Trenat, tragetet dhe taksitë u ndaluan më 1 tetor në Greqi për shkak të një greve masive njëditore nga punëtorët, mësuesit dhe detarët.
Mijëra njerëz demonstruan në qendër të kryeqytetit Athinë kundër ndryshimeve të njoftuara në ligjet e punës dhe një plani qeveritar për t’u lejuar punëdhënësve të zgjasin orarin e punës, raportoi Reuters .
Greva u organizua nga sindikatat më të mëdha private dhe publike të Greqisë, të cilat po kritikojnë qeverinë për një propozim që do t’u lejonte punëdhënësve t’u kërkonin punonjësve të punonin deri në 13 orë në ditë, krahasuar me tetë orë që janë aktualisht – për ata në sektorin privat me një punë.
Kjo kërcënon të drejtat e punëtorëve, thonë sindikatat.
«Jemi këtu për t’i thënë jo ligjit monstruoz», tha Dimitra, një shitëse 24-vjeçare që mori pjesë në demonstratën në Athinë.
Demonstruesit mbanin pankarta të ndryshme ku shkruhej, ndër të tjera:
“Ne nuk jemi makina” dhe “Jo skllavërisë”, shkruhej në njërën nga pankartat që mbanin protestuesit.
Projektligji, i cili u jep punëdhënësve më shumë fleksibilitet në punësimin afatshkurtër dhe ndryshon rregullat për lejen vjetore në sektorin privat, pritet t’i paraqitet parlamentit për miratim këtë muaj.
Qeveria thotë se reforma e planifikuar nuk është e detyrueshme dhe do të zbatohet vetëm deri në 37 ditë në vit.
Thuhet se këto ndryshime u ofrojnë punëtorëve mundësinë për të marrë një rritje të pagave për punën jashtë orarit deri në 40 përqind dhe se propozimi ndoqi kërkesat e punëdhënësve dhe punëtorëve për një treg pune më fleksibël.
Megjithatë, sindikatat thonë se kjo do të rriste presionin mbi punëtorët në Greqi, e cila po rimëkëmbet nga kriza e borxhit 2009-2018, si rezultat i së cilës pagat dhe pensionet u ulën dhe shkaktuan një rritje të papritur të papunësisë.
Edhe pse ekonomia po rimëkëmbet dhe standardet e jetesës janë përmirësuar pas një serie rritjesh të pagave minimale, fuqia blerëse e grekëve mbetet më e ulët se në shumicën e vendeve të Bashkimit Evropian për shkak të rritjes së kostove të strehimit dhe ushqimit.
Punonjësit e sektorit publik thonë se qeveria duhet të rrisë pagat në vend të kësaj.
“Ky ligj vetëm sa zgjat shfrytëzimin e punëtorëve, shkatërron të drejtat e punës dhe të ardhurat e familjeve tona”, thotë 65-vjeçarja Veta Papucaku (65), përfaqësuese e sindikatës së sektorit publik.
SHIKO FOTO NGA ATHINA
