Policia e Kosovës ka njoftuar për një aksident trafiku me pasoja fatale, i cili ka ndodhur dje ,në fshatin Bërnjak të komunës së Rahovecit.
Policia ka njoftuar se aksidenti ka ndodhur mes një veture dhe një traktori, të cilët drejtoheshin nga persona. Si pasojë e përplasjes, lëndime trupore ka pësuar drejtuesi i traktorit, të cilit fillimisht i është ofruar ndihmë mjekësore.
“Rreth orës 22:54, nga Qendra Klinike Universitare e Kosovës (QKUK) është konfirmuar se viktima nuk ka arritur t’u mbijetojë plagëve dhe ka ndërruar jetë”, thekson policia.
Lidhur me rastin, prokurori i shtetit është njoftuar dhe ka urdhëruar që trupi i pajetë të dërgohet në Institutin e Mjekësisë Ligjore për obduksion. Ndërkohë, i dyshuari është ndaluar me vendim të prokurorit.
Policia e Kosovës po vazhdon hetimet për zbardhjen e plotë të rrethanave të këtij rasti.
