Zejdush Kastrati
Gjatë mandatit të kryetarit aktual të Prishtinës, Përparim Rama, qytetarët e kryeqytetit kanë përjetuar vetëm rritje çmimesh: të tatimit në pronë, të shërbimeve për grumbullimin e mbeturinave dhe të furnizimit me ujë.
A duhet vallë ta mbështesim sërish këtë kandidat që kërkon një mandat të dytë për të udhëhequr Prishtinën?
Përveç kësaj, qyteti ynë vazhdon të vuajë nga mungesa e ndriçimit në rrugë e lagje, nga kaosi i komunikacionit e parkimit, si dhe nga zhurmat e motoristëve dhe muzika e lartë e veturave gjatë natës në rrugët më të frekuentuara.
A është kjo arsye që ta mbështesim, apo duhet t’i themi: “Mjaft, nuk të besojmë më, z. Rama”?
Prishtinës i nevojitet një kryetar me “këmbë në tokë”: një pragmatist që merret me hallet e banorëve, që e nis mandatin pa borxhe dhe jeton modestisht – jo si “aristokrat” me 4 milionë euro piktura në shtëpi.
Ne kemi nevojë për një udhëheqës që nuk premton pishina, liqene e tramvaje, por që bashkëjeton me problemet e qytetarëve, veçanërisht me sfidat e nxënësve, studentëve, skamnorëve e hallexhinjve, të cilët kurrë nuk patën mundësi as t’ia shprehin hallin këtij kryetari.
Çfarë mund të presim nga një person që jep tender në qendër të qytetit pa vendim të plotë, e kur punimet ndërpriten dhe bllokohet qyteti, fajëson të tjerët për bllokim dhe deklaron se dikush tjetër duhet të përfundojë në burg?
Nuk e di nëse kandidatët e tjerë janë më të mirë apo do të na zhgënjejnë edhe ata. Por një gjë është e sigurt: edhe pse fillimisht e kemi mbështetur këtë kryetar, zhgënjimi ka qenë aq i madh sa largimi i tij do të krijonte të paktën një klimë më të qetë dhe një shpresë se ndoshta do të dalë dikush më i pranueshëm, më korrekt e më dinjitoz për ta udhëhequr kryeqytetin tonë.
Përparim Rama e pati rastin – por fatkeqësisht, na zhgënjeu.
Gjithsesi, para votimit të 12 tetorit, ia vlen të lexohet edhe raporti i fundit i auditimit, për të parë çfarë thotë ai për aspektet financiare në Komunën e Prishtinës.
