Lidhja Demokratike e Kosovës mbajti një tubim elektoral në Viti, ku kryetari i partisë, Lumir Abdixhiku, prezantoi arritjet e qeverisjes lokale, kandidatin për kryetar të komunës, Sokol Haliti, si dhe listën e kandidatëve për Kuvendin Komunal, duke theksuar vizionin për zhvillim dhe investime të reja në qytet.
Kryetari i LDK-së, Lumir Abdixhiku, gjatë tubimit elektoral në Viti theksoi se partia e tij ka sjellë ndryshime të prekshme në qeverisjen lokale në Viti.
“Kur shikoj Vitinë sot, shoh qytetin që ka ndryshuar shumë. Shoh rrugë të reja, shkolla të rinovuara, sheshe të përfunduara, parqe që e kanë bërë komunën tonë e tuajën shembull në gjithë Kosovën. Shoh punën e kryer me mund dhe përkushtim, punën e tri mandateve të qytetarisë së ndershme të Vitisë. Por mbi të gjitha, shoh një qytet që nuk ndalet. Sepse Vitia është gjithmonë në lëvizje, gjithmonë kërkon më shumë, ndërton më shumë, ëndërron më shumë. Dhe ky ritëm zhvillimi, ky hap përpara, ky vizion i madh, bart vetëm një emër: kandidatin tonë për kryetar të kësaj komune – Sokol Haliti,” theksoi ai.
Abdixhiku shtoi se Vitia ka nevojë për investime të reja, të cilat sipas tij, arrihen vetëm me qeverisjen e LDK-së.
“Të dy bashkë, do të vazhdojmë të ndërtojmë edhe më shumë në katër vitet e ardhshme. Sepse vizioni ynë është i qartë – Vitia që nuk ndalet – një qytet i zhvilluar, një komunë e gjallë, një vend ku fëmijët tanë gjejnë të ardhmen e tyre këtu, në atdheun e tyre,” shtoi ai.
Kandidati i LDK-së për kryetar të komunës, Sokol Haliti, i cili garon për një mandat të ri, u zotua se do të vazhdojë projektet e nisura dhe të sjellë edhe projekte të reja për qytetarët.
“Gjithçka që kemi arritur është vetëm fillimi dhe jo fundi – është koha e projekteve të mëdha. Pse? Sepse ju i keni parë rezultatet. Ne jemi garancia dhe themeli i këtij qyteti. Vetëm me LDK-në, Vitia do të ecë përpara. Vitia është krenaria dhe historia jonë, dhe mbi të gjitha, ajo është e ardhmja e fëmijëve tanë,” u shpreh ai.
Gjatë aktivitetit, LDK prezantoi edhe listën e kandidatëve për Kuvendin Komunal të Vitisë.
