PDK vazhdoi fushatën në Skenderaj me tubim elektoral me të rinjtë, ku kryetari Memli Krasniqi dhe kandidati për kryetar Sami Lushtaku i inkurajuan ata të angazhohen në shkollim, dhe premtuan mbështetje për gjeneratat e reja dhe për zhvillimin e Skenderajt.
Në tubimin me të rinjtë në këtë qytet, kryetari i PDK-së, Memli Krasniqi, e veçoi këtë gjeneratë si shembullin më të mirë të Partisë Demokratike të Kosovës, duke i inkurajuar të ndjekin ëndrrat e tyre me guxim. Krasniqi u dha mesazh të rinjve të Skenderajt që të përkushtohen në shkollim dhe në fusha të ndryshme të jetës, ndërsa i ftoi ata të marrin pjesë masivisht në ditën e votimit.
“Mos u dorëzoni, mos e humbni shpresën. Kjo Kosovë mund të bëhet vetëm me ju, ju ta shkruani kapitullin e ri. Ne si politikanë mund të bëjmë për ju, por ju keni entuziazmin. Ju ftoj të bëheni zemra e ndryshimit që po e kërkon populli ynë edhe në nivel të Kosovës. Të bëheni profesionistët që i dëshirojmë të gjithë. Na mbështetni fuqishëm si gjithmonë, kësaj here edhe më shumë. PDK-ja i ka rrënjët në tërë Kosovën, dhe secili qytetar e ka të qartë se më 12 tetor kryetar i ardhshëm do të jetë Sami Lushtaku”, deklaroi Memli Krasniqi, kryetar i PDK-së.
Kandidati i PDK-së për kryetar të komunës, Sami Lushtaku, të rinjve të Skenderajt u premtoi mbështetje të pakushtë, derisa u kërkoi angazhim për zhvillimin e Kosovës.
“Unë do të jem në shërbim të qytetarëve 24 orë. Pres nga gjeneratat e reja që ta kenë shembull Hashim Thaçin, i cili ka ditur të krijojë aleanca me ndërkombëtarët. Nuk mjafton të jesh vetëm nxënës i mirë, por duhet të jesh edhe aktiv”, tha mes tjerash Lushtaku.
Në tubim u prezantuan edhe kandidatët për asamblenë komunale të PDK-së në Skenderaj.
