Ministri i Kulturës në Lituani, Ignotas Adomavičius, anëtar i partisë së ekstremit të djathtë Nemuno Aušra, ka dhënë dorëheqjen pasi e quajti provokuese një pyetje në lidhje me statusin ligjor të Krimesë dhe refuzoi t’i përgjigjej asaj. Dorëheqja pasoi presionin nga kryeministrja lituaneze Inga Ruginienë, shkruajnë mediat lituaneze.
Adomavičius deklaroi se po jepte dorëheqjen jo për shkak të gabimeve personale, por për shkak të presionit të jashtëm që, sipas tij, kërcënonte sigurinë e familjes së tij. Kur njoftoi dorëheqjen e tij, ministri dukej i hutuar, duke falënderuar një komunitet të paspecifikuar, duke përmendur presionin mbi familjen e tij dhe në fund duke shprehur kënaqësinë që kishte arritur të tërhiqte vëmendjen ndaj kulturës.
Deklaratë kontroverse rreth Krimesë
Polemika shpërtheu pasi një gazetar nga portali lituanez lrytas.lt e pyeti Adomavičiusin në lidhje me statusin e gadishullit ukrainas të Krimesë, i cili është nën pushtimin rus. Ministri e konsideroi pyetjen një provokim.
“Këto janë pyetje provokuese, është më mirë t’i shmangim, meqë nuk ka të bëjë me Ministrinë e Kulturës… Le të mos i luajmë këto lojëra. E kuptoni, ka një vijë që nuk duhet ta kalojmë. Duhet të ndalemi këtu. Për këto pyetje”, tha Adomavičius.
Emërimi i tij si Ministër i Kulturës shkaktoi së fundmi protesta në Lituani, me kritikët që vunë në dyshim kompetencën e tij. Vendimi për ta emëruar atë e shtyu opozitën në parlamentin lituanez t’i kërkonte kryeministres Ruginienë të jepte shpjegime.
Ndërkohë, një grevë paralajmëruese në sektorin e kulturës dhe arteve lituaneze është planifikuar për të martën.
A dini më shumë rreth temës apo dëshironi të raportoni një ga
