Dogana e Kosovës konfiskon një sasi të caktuar nga shuma prej mbi 10 mijë eurove të një qytetari, i cili nuk i kishte deklaruar gjatë hyrjes në pikën kufitare në Vërmicë.
Ai kishte thënë se nuk posedonte mjete monetare për deklarim, ndërkaq pas kontrollës u konstatua se posedonte mjete monetare që tejkalonin kufirin e lejuar prej 10 mijë eurosh, pa bërë deklarimin paraprak.
“Në përputhje me legjislacionin në fuqi, Dogana e Kosovës ka ndërmarrë masat e parapara ligjore, ku është konfiskuar 25% e shumës së padeklaruar, ndërsa pjesa tjetër e mjeteve është ndaluar përkohësisht, deri në përfundimin e procedurave të mëtejshme”, thuhet në komunikatën e institucionit.
Dogana e Kosovës ka rikujtuar se çdo qytetar që kalon pikën kufitare me mbi 10 mijë euro, duhet të deklarohet paraprakisht pranë zyrtarëve doganorë.
