Peshkopi i Perusë, Ciro Quispe López, i akuzuar se ka pasur deri në 17 të dashur të fshehtë, ka dhënë dorëheqjen nga posti i Papa Leos pasi një hetim i Vatikanit konfirmoi akuzat. Skandali u përshkallëzua kur disa nga gratë zbuluan për njëra-tjetrën, gjë që çoi në një konflikt të hapur dhe zbuloi të gjithë aferën, shkruan The Times.
Ciro Quispe López (51), ish-peshkopi i Julios në Peru, është gjendur në qendër të një hetimi të Vatikanit që ka përfshirë intervista me tre nga dashnore e tij të dyshuara. Një dëshmitare kyçe ishte shërbëtorja e tij, e cila u dha hetuesve përshkrime të hollësishme të asaj që gjeti në dhomën e gjumit të peshkopit.
Paola Ugaz, një gazetare peruane e cila ka parë një dokument të Vatikanit mbi hetimin, ka zbuluar detaje të pabesueshme. “Një murgeshë, e cila ishte një nga dashnoret e Quispe, ishte xheloze për një avokat me të cilin peshkopi po takonte gjithashtu dhe i dërgoi informacione në lidhje me aferat e tij një dashnoreje të tretë e cila u grind me avokatin”, tha ajo. “Ishte një telenovelë e vërtetë, por gjithashtu zbuloi një abuzim serioz të pushtetit”, i tha ajo The Times. “Shumë nga 17 gratë ishin shumë të frikësuara për të folur hapur sepse kishin frikë prej tij.”
Hetimi i Vatikanit nisi pasi Kevin Moncada, një gazetar për gazetën peruane Sin Fronteras, e publikoi për herë të parë historinë. “Në prill të vitit të kaluar, morëm informacion se një nga dashnoret e supozuara të peshkopit ishte përfshirë praktikisht në një sherr me një grua tjetër të re”, i tha ai botimit Hildebrandt. “Ky ishte shkaku. Rasti doli në dritë sepse gratë zbuluan se peshkopi po shihte disa prej tyre në të njëjtën kohë dhe kjo i tërboi ato.”
Dëshmi në mesazhe
Sipas njoftimeve, Vatikani ka shqyrtuar shumë mesazhe audio, foto dhe video dashurie që peshkopi u dërgonte grave. Botimi peruan Infobae raportoi se në një nga mesazhet, vetë peshkopi konfirmoi se kishte pasur marrëdhënie seksuale në rezidencën e tij zyrtare.
Sipas gazetarit Ugaz, Quispe bëri një gabim fatal kur gabimisht i dërgoi shërbëtores së tij disa nga videot dhe fotot kompromentuese, të destinuara për dashnoret e tij. Ajo kontaktoi menjëherë Kishën Katolike. Mancado tha se shërbëtorja pa flokët e një gruaje në dushin e peshkopit. Ai raportoi se ajo tha: “Çarçafët e tij kishin njolla. Më duhej t’i pastroja të gjitha”. Peshkopi, nga ana tjetër, i mohoi të gjitha akuzat, duke i quajtur ato një fushatë shpifjesh nga “duar të errëta”.
Akuza për përvetësim dhe kërcënime për linçim
Quispe, i cili u emërua peshkop nga Papa Françesku në vitin 2018, ka qenë gjithashtu nën hetim nga Vatikani për përvetësim të dyshuar të fondeve të kishës. Ugaz tha se Vatikani po hetonte akuzat se Quispe hoqi karriget nga prona e kishës për t’i përdorur në një restorant pule që ishte pjesë e një zinxhiri në të cilin ai kishte një interes financiar. “Zinxhiri quhet Patas Arriba, një frazë që do të thotë ‘përmbys’, por që përkthehet fjalë për fjalë si ‘këmbët në ajër'”, tha Ugaz.
Gazetarja tha se përpara se të largohej nga zyra, Quispe u sfidua nga një grup njerëzish nga grupi indigjen Aymara, të cilët pretenduan se ai kishte përvetësuar fondet e Kombeve të Bashkuara të destinuara për të mbështetur projekte në komunitetin e tyre. “Ai i ktheu paratë, gjë që është e rrallë në Peru, por kjo ndodhi sepse ata kërcënuan ta linçonin, dhe Aymarat njihen për mbajtjen e fjalës së dhënë”, tha ajo.
Kjo nuk është hera e parë që Papa Leo është përballur me korrupsionin në kishën peruane. Përpara se të zgjidhej papë në maj, ai kaloi 20 vjet duke punuar në Peru, ku hetoi abuzimin seksual sektar në urdhrin fetar Sodalitium Christianae Vitae. “Papa Leo është shumë i vetëdijshëm për atë që po ndodh në kishën peruane”, tha gazetari.
