Partia Demokratike e Kosovës ka zhvilluar tubim elektoral në Prishtinë, në lagjen Kodra e Trimave. Sekretarja e Përgjithshme e PDK-së, Vlora Çitaku tha se Kodra e Trimave gjithmonë i ka prirë ndryshimit, e jo rastësisht e ka këtë epitet.
Ajo tha se kandidati i tyre për Prishtinën ka plane konkrete.
“Si dikush që ka qenë politikisht aktive prej vitit 1999, asnjëherë më shumë nuk kam qenë e mbushur shpresë për qytetin në të cilin kam lindur e jam rritur. E kjo shpresë për një Prishtinë më të mirë, për një Prishtinë që i shërben qytetarit, e jo ëndrrave të kryetarit, më është rritur gjatë kësaj fushate zgjedhore, duke e parë projektin e kandidatit tonë sot, e kryetarit të Prishtinës nesër, Uran Ismaili”.
Kandidati i PDK-së për kryetar të Prishtinës, tha se 12 tetori është dita kur Prishtina do ta marrë drejtim të ri.
“Prishtina na takon të gjithëve, do të punojmë për të gjithë pa dallim partiak. Bashkohuni të gjithë me 12 tetor, krejt do të përfitojnë nga investimet tona në Prishtinë. I kemi ndarë 22 milion euro për Kodrën e Trimave, arsyeja është shumë e rëndësishme, sepse për 25 iu kanë marrë votën e nuk ia kanë kthyer investimin”, tha ai para mbështetësve në këtë tubim.
Ismaili tha se Kodra e Trimave ka nevojë për çerdhe, për ndriçim, për trotuare, për hapësira kulturore, infrastrukturë sportive, që tha se do t’i kenë me të si kryetar, derisa premtoi edhe palestër në këtë lagje.
