Nisma Socialdemokrate ka përmbyllur fushatën elektorale për zgjedhjet komunale te 12 tetorit në Vushtrri. Kreu i këtij subjekti politik, Fatmir Limaj si dhe kandidatja për kryetare te Vushtrrisë, Xhevahire Izmaku premtuan përmirësim në të gjitha sferat.
“Ju e keni një shans të madh si Vushtrri, tregoni që me 12 tetor jeni hap i ndryshimit që me këtë datë votoni një grua, partitë nuk ju zgjidhin problemet, ndryshimet i sjellin njerëzit, ata që kanë vepra e angazhime, ata që kanë vepra e që janë të gatshëm t’i i shërbejnë qytetit e fshatit. Ju siguroj që kjo zonjë është fituese, kjo zonjë ka bërë shumë për Vushtrrinë e Kosovën”, tha Limaj
Ndërkaq, kandidatja për kryetare te Vushtrrisë, Xhevahire Izmaku duke kërkuar besimin e vushtrriasve tha se fokusi i saj do te jenë gratë e vajzat.
“Është nder i veçantë që sot bashkë me ju po e përmbyllim një udhëtim njëmujor, një fushatë të jashtëzakonshme. Nuk e mendoj si një projekt politik të mbyllur, është diçka shumë më shumë, është zemra e Vushtrrisë. Si kandidate për kryetare kam menduar çka është më me prioritet në këtë qytet. Gjithë këto ditë, unë ju kam dëgjuar juve, më shumë se gjithçka Vushtrria ka nevojë të fillojë të flasë me zë”, deklaroi Izmaku.
Aty u bë thirrje për mbështetje edhe të kandidatëve të këtij subjekti politik për Kuvendin Komunal.
