Policia e Kosovës ka sekuestruar armë dhe municion në dy raste të ndara në komunën e Rahovecit, pas publikimit të videove në rrjetet sociale ku shiheshin persona duke përdorur armë zjarri.
Në rastin e parë, një person i mitur kishte postuar një video ku shihej duke shtënë me armë zjarri.
Pas identifikimit, njësitet policore kanë ushtruar kontroll në shtëpinë e tij në fshatin Qifllak të Rahovecit, ku kanë gjetur dhe sekuestruar tri armë të gjata, një pistoletë me një karikator, një karikator shtesë, 207 fishekë të llojeve të ndryshme si dhe nëntë gëzhoja kalibër 9 mm.
Sipas njoftimit, i dyshuari është ndaluar për 24 orë me urdhër të prokurorit për shkak të dyshimit për veprat penale “Mbajtje në pronësi, kontroll ose posedim të paautorizuar të armëve” dhe “Përdorim i armës apo mjetit të rrezikshëm”.
Në rastin e dytë, një person tjetër i moshës madhore është identifikuar pas publikimit të një videoje ku shihej duke përdorur një armë zjarri të llojit pistoletë.
Gjatë bastisjes në banesën e tij në fshatin Fortesë të Rahovecit, janë sekuestruar dy pistoleta dhe një karikator. I dyshuari është liruar në procedurë të rregullt, ndërsa ndaj tij është iniciuar procedurë penale për të njëjtat vepra.
Policia ka bërë të ditur se do të vazhdojë angazhimin në parandalimin e përdorimit të armëve të zjarrit dhe në garantimin e sigurisë së qytetarëve, duke u fokusuar në veprime të menjëhershme ndaj çfarëdo shkeljeje që paraqet rrezik për rendin dhe sigurinë publike.
