Si njeri i fjalës dhe besës, u cilësua Sokol Bashota, kandidat i Partisë Demokratike të Kosovës për kryetar të Klinës, nga ana e kryetarit të kësaj partie, Memli Krasniqi.
Prandaj, në tubimin elektoral në këtë qytet, Krasniqi tha se Bashota nuk garon vetëm që Klinës t’i japë drejtim të ri të zhvillimit, por edhe merr edhe përgjegjësinë e PDK-së për të qeverisur këtë komunë të Dukagjinit.
Ai tha se Bashota në këtë rrugëtim të ndryshimit, jo vetëm që ka plane e projekte konkrete për Klinën, por me vete ka edhe ekipin e përzgjedhur që do ta ndihmojnë në realizimin e synimeve për një komunë që do të ndryshojë.
” Klina është gati për rikthim. Rikthim të punës, të dinjitetit dhe të fitores. Rikthim të PDK-së në qeverisje. Sokol Bashota është kryetari që di, do dhe do ta çojë Klinën përpara, me punë, jo me fjalë. Më 12 tetor, voto për zhvillim, për besim dhe për një të ardhme ma të mirë”ka thënë Krasniqi.
Kandidati i PDK-së për kryetar të Klinës, Sokol Bashota, u premtoi bashkëqytetarëve të tij se me të në krye të komunës, Klinës do t’i kthehet drita.
” Lista e PDK-së është lista më e mirë, ka 45 për qind vajza dhe shumë shpejte 50 për qind do të jenë në drejtimin e komunës, e mbi 60 për qind të rinj e të reja. Mbështeteni PDK-në, duke iu dhënë forcë rinisë”, tha ai.
Bashota shpalosi programin e tij dhe projektet mes të cilave ishte përkrahja e bujqve, digjitalizimi në arsim, mbështetja e rinjve në sport e kulturë.
Në këtë tubim elektoral u prezantuan edhe kandidatët për Kuvend Komunal të Klinës nga Partia Demokratike e Kosovës.
