Lidhja Demokratike e Kosovës po synon që ta rikthejë udhëheqjen e Gjilanit me Arbër Ismajlin, kandidatin e saj për kryetar komune. Për këtë arsye, kryetari i kësaj partie, Lumir Abdixhiku, në tubimin elektoral në këtë qytet, ftoi përkrahësit e këtij subjekti politik që ta mbështesin Ismajlin me votë, për, siç tha ai, një qeverisje që do të jetë në shërim të qytetarëve.
Sipas Abdixhikut, programin e saj qeverisës LDK-ja e ka përgatitur për zhvillimin e qytetit dhe përmirësimin e jetës së qytetarëve. Ai shfaqi bindjen se një program e angazhim të tillë nuk e ka asnjë kandidat dhe asnjë subjekt tjetër politik.
“Nga Gjilani po nis një betejë për të kthyer dinjitetin e familjeve e njerëzve që s’kanë kërkuar kurrë drejtësi e barazi… Sot nga ky qytet po nis një zgjim, po nis një rikthim i LDK-së në krye me Arbërin, kryetar të ardhshëm të Gjilanit. Gjilani ka vendosur me votë ta kthejë LDK-në në qeverisje, dhe në krye të këtij ndryshimi qëndron një njeri me karakter të fortë, Arbër Ismajli, kryetar i ardhshëm i Gjilanit”, tha Lumir Abdixhiku, kryetar i LDK-së.
Derisa deklaroi se Gjilani dhe qytetarët e saj kanë nevojë për punë, dinjitet e mirëqenie më të mirë, Abdixhiku rikujtoi se një gjë e tillë mund të arrihet vetëm me udhëheqjen e LDK-së dhe kandidatit për kryetar, Arbër Ismajlit.
“Për rrugë që duhet rregulluar, për kapitale që duhet përmirësuar, flet për punë konkrete, sepse Ismajli është njeri i veprave dhe jo i fjalës. Qeverisje që bashkon dhe që punon. Gjilani meriton një kryetar që i njeh rrugët, shkollat, fshatrat. Gjilani meriton një kryetar që e sheh punën ditë e natë, 7 ditë në javë, vetëm për Gjilanin”, tha mes tjerash kreu i LDK-së.
Teksa shpalosi pjesë nga programi i tij qeverisës, Arbër Ismajli, kandidat i LDK-së për kryetar të Gjilanit, tha se planet e tij parashohin projekte konkrete që garantojnë jetë më të mirë për të gjithë gjilanasit, duke filluar nga zhvillimi ekonomik e deri tek punësimi dhe investimet në infrastrukturë.
“Ne i kemi dhënë prioritet zhvillimit ekonomik, 114 milion euro të mbetura, rikthimi i mjeteve financiare kapitale… Stadiumi, qyteti, impiantet e ujërave të zeza do të përfundojmë”, deklaroi Ismajli.
Në këtë tubim zgjedhor, Ismajli përmendi edhe arsimin si prioritet të tij, duke theksuar se përmirësimi i këtij sistemi do të jetë në fokus të angazhimit të tij si kryetar i Gjilanit. Përveç kësaj, projekte të tjera përfshijnë krijimin e vendeve të reja të punës dhe përkrahjen e bizneseve lokale, në mënyrë që, siç u shpreh ai, qytetarët ta shohin të ardhmen e tyre në Gjilan.
“Do ta ndërtojmë Gjilanin e ri. Kemi me ndërtuar këtë qytet, kemi me i dhënë mundësi njerëzve me jetuar në këtë qytet, sepse atë që e thojmë e bëjmë. Kemi me punuar në arsim, shëndetësi”, theksoi mes tjerash Arbër Ismajli, kandidat për kryetar të Gjilanit.
Në këtë tubim elektoral u tha se qytetarëve të Gjilanit duhet t’u kthehet dinjiteti dhe se për këtë nuk ka rrugë tjetër përveç rikthimit të LDK-së në qeverisjen komunale.
