Prokuroria Themelore në Gjakovë, Departamenti për Krime të Rënda, ka paraqitur kërkesë për caktimin e paraburgimit ndaj të pandehurit me inicialet R.E., për një periudhë prej 30 ditësh, si dhe ka marrë aktvendim për fillimin e hetimeve.
Sipas kërkesës së Prokurorisë, më 08 tetor 2025, rreth orës 06:00 në qytetin e Gjakovës, gjatë kontrollit dhe bastisjes në shtëpinë e të pandehurit, janë gjetur dhe sekuestruar 5 kilogramë e 43 gram substancë narkotike, e dyshuar për marihuanë.
“Me këto veprime formohet dyshimi i bazuar se i pandehuri ka kryer veprën penale, blerja, posedimi, shpërndarja dhe shitja e paautorizuar e narkotikeve, substancave psikotrope dhe analoge nga neni 267 par.1 të KPRK-së:, thuhet në njoftim.
I pandehuri ndodhet nën masën e ndalimit 48 orësh, që nga data 8 tetor 2025, me vendim të Prokurorit të Shtetit, ndërsa Prokuroria ka kërkuar nga Gjykata caktimin e paraburgimit për shkak të rrezikut të ikjes dhe ndikimit në prova.
