Partia Demokratike e Kosovës ka përmbyllur sonte fushatën zgjedhore në Ferizaj, me bindjen se me Agim Aliun në krye, PDK do të udhëheqë edhe për një mandat të ri në këtë komunë.
Kryetari i PDK-së, Memli Krasniqi, tha se Ferizaj është shembulli i qeverisjes së përgjegjshme dhe zhvillimore që ka sjellë kjo parti. Ai theksoi se puna dhe rezultatet e deritashme të Agim Aliut janë garanci për vazhdimësinë e qeverisjes së PDK-së në Ferizaj.
“Të gjithë ju që jeni këtu duhet të jeni krenarë për qytetin tuaj, sepse ai është bërë simbol i zhvillimit, transformimit dhe dinjitetit. Dhe ky sukses ka një emër – Agim Aliu. Ferizaji është model i vizionit të PDK-së për qeverisjen lokale. Në katër vitet e ardhshme, ai ka plan për mbi 200 milionë euro investime, që do të përmirësojnë jetën e çdo qytetari në çdo lagje e fshat. Ferizaj është shembull i suksesit që do ta ketë gjithmonë mbështetjen tonë,” theksoi Krasniqi.
Kandidati i PDK-së për kryetar të Ferizajt, Agim Aliu, kërkoi mbështetjen e qytetarëve për të çuar përpara projektet që kanë nisur.
“Ne i kemi dhënë provat se si bëhet një qytet, se si transformohet. Ne jemi gati për detyrat dhe sfidat e reja që do t’i shkruajmë në faqe të historisë, për ta ngjitur akoma më lart Ferizajin modern dhe të zhvilluar,” tha Aliu.
PDK prezantoi edhe listën e kandidatëve për Kuvendin Komunal të Ferizajt, duke theksuar se ekipi përbëhet nga profesionistë të fushave të ndryshme, që synojnë ta çojnë përpara vizionin e kësaj partie për zhvillimin e Ferizajt.
