Lajmi se në Kosovë kanë ardhur mijëra dronë kamikazë, ka shkaktuar menjëherë reagim të ashpër nga Beogradi zyrtar. Deklaratën e Vuçiqit se Ankaraja zyrtare shkon drejt ringjalljes së Perandorisë Osmane, presidentja Vjosa Osmani e quajti të turpshme, ndërkohë që homologun e saj serb e porositi të bashkëpunojë me vendet anëtare të NATO-s, e jo të vazhdojë ta thellojë bashkëpunimin ushtarak me Rusinë, Kinën dhe Iranin.
Ndërkohë, ekspertët e sigurisë e konsiderojnë këtë zhvillim si një hap drejt forcimit të mbrojtjes dhe stabilitetit të vendit.
Arritja në vendin tonë e kontejnerëve me mijëra dronë të avancuar kamikazë “Skydagger”, të prodhuar në Turqi, u vlerësua si një hap që Forca e Sigurisë së Kosovës e hedh drejt ndërtimit të një ‘force moderne dhe bashkëkohore’. Është bërë me dije se ushtarët e Forcës së Sigurisë, tashmë janë trajnuar për përdorimin e këtyre donëve.
Për njohës të fushës së sigurisë, arritja e dronëve shihet si shtim i sigurisë për vendin.
“Kosova ka nevojë immediate të vazhdojë në shtimin e forcave të sigurisë jo vetëm me ushtri, por edhe sektore të tjera, sidomos në çështjen e mbrojtjes ajrore, por edhe tokësore, në fushën e policisë por edhe luftën hibride. Gjithashtu në fushën e kibernetikës?. të forcohet partneriteti me BE e NATO”, tha Gurakuq Kuqi, njohës i sigurisë.
Por, lajmi se në Kosovë kanë zbarkuar mijëra dronë kamikazë, ka shkaktuar menjëherë reagim të ashpër nga Beogradi, duke e vënë Ankaranë në një pozitë shumë delikate për ta ruajtur ekuilibrin diplomatik.
Tonet e ashpra të Viçiqit shkojnë drejtë akuzave se Turqia po shkel ligjet ndërkombëtare dhe destabilizon Ballkanin Perëndimor, duke nënvizuar se Ankaraja zyrtare shkon drejt ringjalljes së Perandorisë Osmane.
Për ironi, vetë qeveria e Vuçiqit vazhdon modernizimin e arsenalit ushtarak përmes bashkëpunimeve të ngushta me Rusinë dhe Kinën, pavarësisht kundërshtimeve nga Bashkimi Evropian dhe NATO-ja.
Deklarata e Vuçiqit u quajt e turpshme nga presidentja Vjosa Osmani, e cila Turqinë e cilësoi si aleate të përkushtuar të NATO-s. Madje ajo ka nënvizuar se Vuçiq duhet të bashkëpunojë me vendet anëtare të NATO-s, e jo të vazhdojë ta thellojë bashkëpunimin ushtarak me Rusinë, Kinën dhe Iranin.
Deri më tani nuk ka pasur ndonjë reagim zyrtar nga nivelet e larta të Ankarasë ndaj akuzave të Vuçiqit.
Kjo shitje e dronëve nuk përbën devijim nga politika e stabilitetit të Turqisë, por përkundrazi pasqyron realitetin gjeopolitik: Turqia është anëtare e NATO-s, ndërsa Kosova është partnere që synon integrimin euroatlantik, një rrugë që Ankaraja e mbështet zyrtarisht.
Ndryshe, kryeministri në detyrë, Albin Kurti, ka nënvizuar se Qeveria ka nënshkruar kontratë për blerjen e dronëve në dhjetor të vitit të kaluar me kompaninë turke Baykar, dhe arritja e tyre ishte planifikuar të realizohej në janar të vitit të ardhshëm.
Me blerjen e këtyre dronëve, Kosova po vazhdon ta ngrejë dhe shtojë fuqinë goditëse të ushtrisë sonë me qëllim ndërtimin e një force të aftë dhe koherente me zhvillimet e reja teknologjike dhe taktikat e luftës bashkëkohore, ka vënë në pah kryeministri në detyrë, Albin Kurti. Këta dronë kamikazë janë dronë luftarakë të pajisur me mjete shpërthyese me qëllim goditjen e objektivave lëvizëse dhe statike të armikut.
