Ish-presidenti amerikan, Joe Biden, po i nënshtrohet terapisë me rrezatim si pjesë e trajtimit për kancer në prostatë.
Lajmin e ka konfirmuar zëdhënësi i tij, teksa 82-vjeçari po merr gjithashtu trajtim me hormone, ndërsa seanca e rrezatimit pritet të zgjasë pesë javë, raporton BBC.
Sipas mediave amerikane, kjo shënon një fazë të re në kujdesin mjekësor të ish-presidentit.
Në maj, zyra e Biden kishte bërë të ditur se ai ishte diagnostikuar me një formë më agresive të kancerit, që ishte përhapur në kocka. Mjekët kishin zbuluar sëmundjen pas shfaqjes së disa simptomave urinare.
Megjithëse bëhet fjalë për një formë të avancuar të kancerit, mjekët thonë se ai është “i ndjeshëm ndaj hormoneve”, çka e bën të mundur menaxhimin efektiv të tij.
Joe Biden, i cili u largua nga detyra në janar si presidenti më i moshuar në historinë e SHBA-së, ka qenë për vite me radhë një përkrahës i fortë i kërkimeve për kancer. Në vitin 2022, ai dhe bashkëshortja e tij, Jill Biden, rifilluan iniciativën “Cancer Moonshot” për të parandaluar miliona vdekje nga kjo sëmundje deri në vitin 2047.
