Një 17-vjeçar është gjetur pa shenje jete pasditën e sotme në rrugën Landovicë–Gjonaj, i njëjti kishte dalë mbrëmë nga shtëpia dhe nuk ishte lajmëruar në telefon, kurse sot ishte raportuar si i zdukur.
Policia e Kosovës ka njoftuar se viktima është identifikuar si V.N. nga lagjja Arbane e Prizrenit.
Zëdhënësi i Policisë për rajonin e Prizrenit, Shaqir Bytyqi, ka bërë të ditur për mediat se dyshohet që 17-vjeçari ka humbur kontrollin mbi motoçikletën që po ngiste, duke dalë nga rruga dhe u përplasur në një mur mbrojtës pranë një shtëpie në ndërtim.
“Sot, rreth orës 16:00, policia është njoftuar se në rrugën Landovicë–Gjonaj disa qytetarë që po punonin në ara kanë vërejtur një person të shtrirë rreth 7–8 metra larg rrugës. Menjëherë njësitet përkatëse të Policisë së Kosovës kanë dalë në vendngjarje dhe kanë konstatuar se personi nuk shfaqte shenja jete”, ka theksuar ai.
Sipas tij, bazuar në të dhënat fillestare, dyshohet se aksidenti ka ndodhur si pasojë e mos-përshtatjes së shpejtësisë me kushtet e rrugës, çka ka rezultuar me lëndime të rënda trupore dhe vdekjen e menjëhershme të të miturit në vendin e ngjarjes.
Policia e Kosovës, në bashkëpunim me Prokurorinë Themelore në Prizren, po vazhdon hetimet për të sqaruar të gjitha rrethanat e rastit.
