Në kuadër të aktiviteteve të rregullta të kontrollit në terren, njësitë e Doganës së Kosovës kanë realizuar një aksion kontrolli në një subjekt ekonomik në Prishtinë, ku kanë zbuluar një sasi të konsiderueshme të telefonave të padeklaruar.
Gjatë kontrollit, në një nga bodrumet e objektit është gjetur një kasafortë e mbuluar me pako të ndryshme, e cila pas hapjes ka rezultuar të përmbajë pajisje elektronike të reja, të fshehura dhe të pashoqëruara me dokumentacion ligjor për origjinën apo importin e tyre.
Sipas njoftimit zyrtar nga Dogana e Kosovës, janë sekuestruar gjithsej 41 pajisje elektronike të reja, si më poshtë:
19 telefona të mençur Samsung Galaxy A26 5G
21 telefona të mençur Samsung Galaxy A16
1 tablet Samsung Galaxy Tab A9+ 5G
Dogana ka njoftuar se sekuestrimi është bërë në përputhje të plotë me procedurat ligjore, ndërsa për rastin është përpiluar dokumentacioni përkatës.
Autoritetet kanë nisur procedurat për hetimin e mëtejshëm të subjektit, për të konstatuar shkeljet doganore dhe përgjegjësitë ligjore që dalin nga rasti.
