Kreu i partisë Bashkimi Demokratik për Integrim në Maqedoninë e Veriut, Ali Ahmeti u shpreh se “dita e sotme i takon UÇK-së dhe të gjithë jemi në përkrahje të çlirimtarëve”.
Ahmeti nga sheshi “Skënderbej ku po merr pjesë në protestën në mbështetje të ish-krerëve të Ushtrisë Çlirimtare të Kosovës theksoi se UÇK-së po i bëhet një padrejtësi e madhe nga organizime tepër konspirative të Beogradit dhe Moskës.
“Filloi mbrapsht me Dick Marty-n, i cili vuri në alarm Brukselin, Washingtonin se gjoja UÇK është marrë me tregtim të organeve të brendshme të njerëzve, dhe ky ishte fillimi”, tha Ahmeti.
Sipas Ahmetit, procesi devijoi pasi të gjithë argumentet ranë dhe nuk kishte asnjë fakt që UÇK ka bërë një veprim të tillë.
“Sot ne jemi në kërkim të drejtësisë dhe besojmë që drejtësia në fund do të vendosë drejt. UÇK ka qenë një organizatë çlirimtare, ka qenë një organizatë që ka punuar ngushtë me NATO-n, Amerikën, Evropën dhe ne u jemi mirënjohës. Ne lirinë e fituam me gjak, por çlirimin me aleatë”, vijoi ai.
Ahmeti u shpreh se UÇK ka respektuar të gjitha konventat ndërkombëtare mbi luftërat dhe nuk mund të vendoset një barazi mes agresorit dhe çlirimtarëve.
“Ne kërkojmë që drejtësia të vendoset në vend. Nuk mund të dënohen njerëzit që kanë luftuar për lirinë e kombit të vet. Pres që drejtësia të vendosë drejt dhe sa më parë të shpallen të pafajshëm dhe të kthehen në atdheun e tyre”, pohoi Ahmeti.
Kreu i partisë Bashkimi Demokratik për Integrim në Maqedoninë e Veriut nënvizoi se protesta sot bën bashkë gjithë shqiptarët në sheshin Skënderbej, ndërsa ai zgjodhi të mos komentojë qëndrimet për mospjesëmarrje në protestë nga ana e opozitës shqiptare dhe asaj në Kosovë.
“Nuk komentoj vendimet e autoriteteve pasi protesta s’ka të bëjë me politizim apo partizim, thirrja u është bërë të gjitha subjekteve”, tha Ahmeti.
