9:50 – KSHZ-ja ka publikuar të dhënat e para për daljen e votuesve deri në orën 9. Sipas këtyre të dhënave, deri në orën 9:15 të drejtën e tyre për të votuar e kanë shfrytëzuar 3 për qind e votuesve.
Kryetari i KSHZ-së, Boris Kondarko, tha se të gjitha qendrat e votimit u hapën në kohë dhe se votimi po zhvillohej pa probleme.
“Deri më tani, KSHZ-ja nuk ka marrë asnjë raport në lidhje me rrjedhën e votimit për asnjë qendër votimi ose nga ndonjë komision zgjedhor komunal, tha Kondarko.
Gjatë konferencës së parë për shtyp KSHZ-ja njoftoi për një pengesë teknike në një vendvotim në Kumanovë. Sipas kreut të KSHZ-së Boris Kondarko, për shkak të ndërprerjes së rrymës elektrike në këtë vendvotim nuk mund të përdoret aparati biometrik. Me vendim të KSHZ-së votimi ka vazhduar me sprej dhe uv lamb.
“Në Kumanovë në një vend votim në të cilin janë të regjistruara 12 votues, për shkak të ndërprerjes së rrymës, KSHZ-ja ka sjell vendim që procesi zgjedhor në këtë vendvotim të vazhdoj pa pajisje elektronike, me uv llambë dhe me sprej”, tha Boris Kondarko, kryetar i KSHZ-së.
09:00 – Në ora 07:00 të mëngjesit kanë filluar votimet për zgjedhjet e tetë lokale që nga pavarësimi i Maqedonisë së Veriut. Komisioni Shtetëror Zgjedhor (KSHZ) ka konfirmuar se vendvotimet janë hapur me kohë.
KSHZ do të publikojë rezultatet paraprake të zgjedhjeve në mënyrë suksesiive, sipas të dhënave të marra elektronikisht nga komisionet komunale zgjedhore. Rezultatet përfundimtare duhet të publikohen më së voni 24 orë pas përfundimit të procesit zgjedhor.
Komisionet zgjedhore komunale duhet të shpallin rezultatet paraprake brenda 7 orëve pas mbylljes së votimeve, duke u bazuar në të dhënat nga këshillat zgjedhorë, dhe ato do të publikohen në tabelat informuese në komunat përkatëse dhe në mediat publike.
Për Qytetin e Shkupit, rezultatet paraprake për këshillin dhe kryetarin e qytetit do të publikohen brenda 10 orëve nga përfundimi i votimit.
8:00 – KSHZ: Në kohë janë hapur të gjitha vendvotimet
Komisioni Shtetëror Zgjedhor (KSHZ) njoftoi se të gjitha vendvotimet janë hapur me kohë dhe se procesi i votimit për zgjedhjet lokale po zhvillohet pa ndonjë problem.
Votimi po mbahet në gjithsej 3,474 vendvotime, ku të drejtë vote kanë 1,832,415 qytetarë.
Në këto zgjedhje lokale po marrin pjesë:
309 kandidatë për kryetarë komunash
576 lista për anëtarë të këshillave komunalë, me gjithsej 10,490 kandidatë
Dita e djeshme ishte e rezervuar për votimin e:
të burgosurve,
personave në arrest shtëpiak,
të sëmurëve dhe personave me aftësi të kufizuara,
dhe të moshuarve në shtëpitë e pleqve.
KSHZ ka paralajmëruar se konferenca e parë për shtyp për ecurinë e votimit dhe për daljen në votime do të mbahet në ora 09:30.
Rezultatet e para paraprake nga KSHZ priten të publikohen brenda 12 orëve pas përfundimit të votimit.
Qëndroni me ne për të rejat më të fundit nga dita zgjedhore!
07:50- Të gjitha 117 vendvotimet në Tetovë janë hapur në kohë
Në qytetin e Tetovës, të gjitha 117 vendvotimet janë hapur në kohë, raporton gazetari i TV21, Senat Zylbehari. Të drejtë vote kanë 87,987 qytetarë.
Ndërkaq, gjatë ditës së djeshme kanë votuar rreth 62 persona të dënuar nga Burgu i Tetovës dhe 99 persona të sëmurë.
“Të gjitha vendvotimet në qytetin e Tetovës janë hapur, të gjitha 117 vendvotimet.
Paraqiten probleme teknike me pajisjes bimetrike për identifikimin e votuesve, mirëpo janë të angazhuar edhe personat e IT-së nga ana e KSHZ-së, që në çdo objekt shkollor ka nga një person përgjegjës të IT-së”, tha Nazmi Dauti, kryetar i KKZ-Tetovë.
Në Maqedoninë e Veriut sot po zhvillohet raundi i parë i zgjedhjeve lokale, në të cilat qytetarët do të zgjedhin kryetarët e 80 komunave dhe të Qytetit të Shkupit, si dhe këshilltarët komunalë.
Sipas Komisionit Shtetëror të Zgjedhjeve (KSHZ), në Listën e Votuesve janë regjistruar 1,832,415 votues, të cilët pritet të votojnë në 3,474 qendra votimi në mbarë vendin. Në garë janë 309 kandidatë për kryetar komune dhe 576 lista për këshilltarë komunalë, me gjithsej 10,490 kandidatë.
Në procesin zgjedhor marrin pjesë 22 parti politike, 19 koalicione dhe 119 grupe votuesish të pavarur. Qyteti i Shkupit shënon numrin më të madh të kandidatëve për kryetar – 16 gjithsej.
Zgjedhjet po monitorohen nga 1,451 vëzhgues, prej të cilëve 807 vendorë dhe 644 ndërkombëtarë.
Votimi ka filluar në orën 07:00 dhe përfundon në orën 19:00. Ai mund të zgjatet nëse në qendrën e votimit ka ende qytetarë që nuk kanë hedhur votën, ose në rastet kur procesi ndërpritet për shkaqe teknike apo vendime të KSHZ-së. Në rast ndërprerjeje më të gjatë se një orë, votimi mund të shtyhet për të njëjtën periudhë, por jo më shumë se tre orë.
Pas mbylljes së kutive në orën 19:00, votimi ndalon dhe fillon përgatitja për numërimin e votave, që nuk mund të nisë para përfundimit zyrtar të procesit.(INA)
