Agjencia për Parandalimin e Korrupsionit (APK), me mbështetjen e Misionit të OSBE-së në Kosovë, ka përmbyllur me sukses tri punëtori njëditore me temën “Përditësimi i Planeve të Integritetit”, të mbajtura gjatë datave 21–23 tetor 2025.
Sipas njoftimit nga APK, në këto punëtori morën pjesë mbi 100 zyrtarë përgjegjës nga institucione qendrore dhe lokale, të cilët luajnë një rol të rëndësishëm në zbatimin e politikave parandaluese dhe forcimin e integritetit publik.
“Në këto punëtori u prezantua qasja e re metodologjike e Agjencisë për hartimin dhe përditësimin e planeve të integritetit, e cila pritet të zbatohet në fund të këtij viti”, thuhet në njoftim.
Tutje theksohet se pjesëmarrësit u pajisën me njohuri praktike për vlerësimin e rreziqeve, përmirësimin e planeve ekzistuese të integritetit dhe për zbatimin e masave konkrete për forcimin e etikës institucionale.
