Biblioteka Kombëtare e Kosovës “Pjetër Bogdani” njofton se, për herë të parë, do të jetë nikoqire e Takimit Vjetor të Drejtorëve të Bibliotekave Kombëtare të Evropës Juglindore (SEENL), që do të mbahet në Prishtinë nga 28 deri më 30 shtator 2026.
Në njoftimin e Bibliotekës Kombëtare thuhet se ky takim përfaqëson një ngjarje të rëndësishme për bibliotekarinë, bashkëpunimin kulturor dhe shkëmbimin profesional në rajon.
“Ngjarja do të mbledhë drejtuesit e bibliotekave kombëtare nga vendet e Evropës Juglindore, me qëllim të shkëmbimit të përvojave, zhvillimit të projekteve të përbashkëta dhe forcimit të rrjetëzimit ndërinstitucional në fushën e dijes dhe kulturës”, thuhet në njoftim .
Kandidatura e Bibliotekës Kombëtare të Kosovës për organizimin e këtij takimi është mbështetur nga shumica e anëtarëve të Rrjetit të Bibliotekave Kombëtare të Evropës Juglindore (SEENL), duke përfaqësuar një vlerësim të rëndësishëm për rolin dhe kontributin e institucionit në promovimin e kulturës, dijes dhe bashkëpunimit rajonal.
Detajet rreth programit dhe aktiviteteve përcjellëse do të publikohen në muajt në vijim.
