Pamje të pabesueshme kanë dalë në internet që tregojnë arratisjen e qetë të dy hajdutëve nga Luvri, pasi vodhën xhevahire të kurorës franceze me vlerë 88 milionë euro . Videoja, e cila është bërë virale, tregon hajdutët duke zbritur ngadalë nga vendi i krimit në një ashensor mallrash, duke shënuar kthesën e fundit në njërën nga grabitjet më spektakolare në Francë në dekada, raporton The Guardian.
Çfarë zbulon videoja?
Videoja 36-sekondëshe, e cila u autentikua nga Le Parisien, tregon dy burra të veshur me të zeza që zbresin ngadalë një ashensor të jashtëm mallrash nga Galeria Apollo. Njëri prej tyre mban një jelek reflektues të verdhë, ndërsa tjetri një helmetë motoçiklete. Videoja duket se është xhiruar nga një dritare aty pranë në muze, me pamje nga Quai François Mitterrand, ku hajdutët kishin parkuar më parë një kamion të vjedhur me një shkallë 30 metra të cilën e përdorën për të hyrë në galeri në katin e parë.
Gjatë regjistrimit, një zë, ndoshta i një roje sigurie, mund të dëgjohet duke thënë në radio: “Ka individë në skuterë. Po ikin, po ikin.” Vetëm pak sekonda më vonë, burrat shihen duke ikur me dy skuterë, ndërsa një zë tjetër bërtet: “Dreq, ja ku po vijnë – policia.”
Grabitje shtatë minutëshe
Grabitja ndodhi të dielën në orën 9:30 të mëngjesit, menjëherë pas hapjes së muzeut. Dy nga katër anëtarët e bandës hynë me forcë në galeri duke thyer një dritare që dukej se nuk ishte e siguruar. Duke përdorur një prerës disku, ata hapën dy vitrina dhe vodhën tetë bizhuteri të paçmuara. Midis sendeve të vjedhura ishin një gjerdan me smerald dhe diamant që Napoleoni I ia dha gruas së tij të dytë, Marie Louise, dhe një diademë që dikur i përkiste Perandoreshës Eugénie, gruas së Napoleonit III.
Mediat franceze raportuan se i gjithë operacioni zgjati më pak se shtatë minuta dhe se grabitësit qëndruan në galeri vetëm për 3 minuta e 58 sekonda. Ministri i Brendshëm Laurent Nuñez konfirmoi se më shumë se 100 hetues po punojnë për rastin.
Të mërkurën, drejtoresha e Luvrit, Laurence des Cars, pranoi një “mungesë të tmerrshme” para senatorëve . Ajo konfirmoi se mbulimi i kamerave të sigurisë të mureve të jashtme të ndërtesës së madhe ishte “dukshëm i pamjaftueshëm”, gjë që me sa duket ua bëri punën grabitësve më të lehtë.
