Krerët e institucioneve të shtetit, presidentja Vjosa Osmani, kryeparlamentari Glauk Konjufca dhe kryeministri Albin Kurti do të qëndrojnë sot në Reçak të Shtimes, për të bërë homazhe në Kompleksin Memorial, aty ku 24 vjet më parë ndodhi masakra më e tmerrshme ndaj popullsisë civile shqiptare.
Më 15 janar të vitit 1999, në Reçak forcat serbe vranë 45 civilë shqiptarë. Numri më i madh i viktimave u gjet në Kodrën e Bebushit, ndërsa të vrarë kishte edhe në pjesë të tjera të fshatit.
Në këtë ditë përkujtimore, pas tri vjetësh për shkak të pandemisë, do të merr pjesë edhe ish-shefi i Misionit Verifikues për Kosovën, William Walker, i cili masakrën e Reçakut e kishte quajtur “krime kundër njerëzimit”. E pas kësaj masakre ndodhi edhe konferenca e paqes në Rambouillet dhe pas edhe fushata ajrore e NATO-s kundër Serbisë.
Masakra në Reçak u organizua dhe u krye nga forcat policore, ushtarake dhe paraushtarake serbe, ndërsa Serbia edhe sot e kësaj dite refuzon ta pranojë këtë krim makabër.
E një ditë pas kryerjes së masakrës, William Walker, ambasadori i OSBE-së në Kosovë, vizitoi vendin e ngjarjes dhe u tmerrua nga ajo që pa në Kodrën e Bebushit, kufoma të masakruara. Ai deklaroi se “nga ajo që pashë nuk ngurroj të përshkruaj ndodhinë si masakër dhe krim kundër njerëzimit. Kjo është ngjarja më trishtuese në jetën time”.
